Versets Bibliques du jour

En ce temps-là, Jésus disait à ses disciples : "Comme cela s'est passé dans les jours de Noé, ainsi serait-il dans les jours du Fils de l'homme. On mangeait, on buvait, on prenait femme, o' prenait mari, jusqu'au jour où Noé entra dans l'arche, et où survint le déluge qui les fit tous périr. Il en était de même dans les jours de Loth : on mangeait, on buvait, on achetait, on vendait, on plantait, on batissait; mais le jour où Loth sortit de Sodome, du ciel tomba une pluie de feu et de soufre qui les fit tous périr; cela se passera de la même manière, le jour où le Fils de l'homme se révélera."

Bonjour et week-end sans excès à tous !

Bien-aimé, tu agis fidèlement dans ce que tu fais pour les frères, et particulièrement pour les étrangers. En présence de l'Eglise, ils ont rendu témoignage à la charité ; tu feras bien de faciliter leur voyage d'une manière digne de Dieu. Car c'est pour son nom qu'ils se sont mis en route sans rien recevoir des païens. Nous devons donc apporter notre soutien à des tels hommes, pour être des collaborateurs de la vérité.

Bonjour et paisible week-end à tous. 
Que Dieu prenne en pitié ceux qui nous ont dévancés, et garde tous ceux qui les auront accompagnés !

Si quelqu'un ne veut pas travailler, qu'il ne mange pas non plus ! Or, nous apprenons que certains parmi vous vivent dans l'oisiveté, affairés sans rien faire. À ceux là nous adressons dans le Seigneur Jésus Christ cet ordre et cet appel: qu'ils travaillent dans le calme pour manger le pain qu'ils auront gagné. Quant à vous frères, ne vous lassez pas de faire le bien.

Bonjour et bon début de semaine à tous 

Père, fais-nous voir ton amour!

_ Accorde-nous de vivre ensemble et d'être unis.
Laisse venir à toi les enfants :
_ Ton Royaume est à ceux qui leur ressemblent.
Donne à ceux qui préparent l'avenir _de bâtir un monde juste et fraternel.
Tu nous demandes d'aimer nos ennemis : 
_ convertis leur cœur et le nôtre.
Accueille tes enfants dans ta demeure éternelle :
_ qu'ils voient la douceur de ta face.

Bonjour et merveilleux mardi à tous !

Ce que tu n'aimes pas, ne le fais à personne. Donne de ton pain à celui qui a faim et des vêtements à ceux qui sont nus. Prends conseil de toute personne avisée. En toute occasion, bénis le Seigneur ton Dieu et demande-lui de rendre droit tes chemins. Garde en mémoire ces instructions et qu'elles ne s'effacent pas de ton coeur.

Bonjour et fructueux mercredi à tous.

En ce temps-là, lorsque Jésus fut près de Jérusalem, voyant la ville, il pleura sur elle en disant : Ah ! si toi aussi, tu avais reconnu en ce jour ce qui donne la paix ! Mais maintenant, cela est resté caché à tes yeux. Oui, viendront pour toi des jours où tes ennemis construiront des ouvrages de siège contre toi, t'encercleront et te presseront de tous côtés ; ils t'anéantiront, toi et tes enfants qui sont chez toi, et ils ne laisseront pas pierre sur pierre, parce que tu n'as pas reconnu le moment où Dieu te visitait."

Bonjour et joyeux jeudi à tous !

Sɔ́m ghɔm cwǝpuŋ tǝ̂ gɔ pə́ tə́m shwǝ̌ po pə́ ; da'gaǝ́ a pǝ̂ wǝ́ shǝ́ŋ, po té â ghɔm pǝpúŋ tsyǝ pǝ́ á nyáptǝ, bíŋ ŋwɛ́nyǝ́ dzǝ̌ pɔ pyǝ wáp wǝ́ jú' wɔ́ lǝ. Nǝ́ nyaptǝ tyǝ́' yǝ Sî gɔ há vɔk bí po á, â bǝ pú lě bvó mtiŋ Zhwenyǝ Dɔ̂lɔ̌ nǝ́ po : po kǝ̂ ghə̌ ê lá'á. Po pǝ́ shwǝ́ á tǝ sǝ̂m, tǝ kamshɛ, tǝ yɛ̌lúŋ, tǝ cɔ̌ktǝ́, tǝ capshwǝ̀, tǝ sə̂tʉ̌m. Po ghǝ́ á tʉ̂m pǝpûŋ ba pyányǝ cǝcǝ̌ po. Po wá' mhɔ cǝcǝ̌ wɔ́wɔ́, dǝ́ŋdǝŋ pâ' Sǐ lǝ cyǝ m nǝ̂ Krǐsto gwá' mhɔ mɔ́ áá.

Á Sî cɔ̂mdzə́nyə́ ywɔ́k níŋ byányə́ nə́ po nə́ yəŋ fǝládê tyǝ̌'pfô !

Cyəpɔ̂ bə́ tâ guŋ pɔ awɛ́, bə ghámtə é ló kɛbə̀ŋ.
Waə̌ pâ' Cyəpɔ Sî yɔ́kpə â ? Ê shwə́ tə thə́ da'gaə́ bə́ bɔ́ nə̂ e dé kɛbəŋ ba sîcǎ'.
Ê nté pwáŋko ntʉ́m vɔ́p, nté bə́ŋ ntʉ́m və́, níŋ é cəcə̌ mkâmvʉ̂' pyə́. Ê níŋ ŋkîŋ mjwǐ dyə́ é, e zhí mə̂buŋtsě cəcə̌ pô pyə́.

Pǝ pɔ́m sásǝdê shyǝ̂ŋkǔ' yǝŋ tǝ̌ â púŋŋ́ ! Ywə́tsʉ́ sí'nyə́ gwya monəŋ shyə́ cúpú. 

Yěsô lə pə̌ Dyə̂sǐ nə́ cwyatə, shwə́ má' mnyə́ jɔ́ pâ' mghɛtsə́ wə́ má' shwop ntʉ́m Kàk. E lə pǐŋ jɔ́ pâ' ta' ŋkəyo' mpfɔ̂k mjwǐ ma' tsə̂ bɛ pʉə́ Kak á gɔm gaə̂ : "Kwa' nyə́nyɔ́ tə̂ gaə̌ wə́ síŋ wɔ́ : ŋkəmnyə mpfɔ̌k yə̌ŋ ma' shyə́ guŋ pɔ awɛ́ nə̂kə́lə́, pyəshə́ pɔ awɛ́ ghɔ nə̂ du tsə̂ tsáp, syə́p á mûywə́ yə pə́ a lə kwítə́ wáp; sɔ́' mpá' yʉ́ á, e cwétə pʉə pə̂ŋ é, nté guŋ ywə́ yə a kə̂ shʉ́' bí í nə́ nə bvɔ́kɔ́ áá."

Gɛywə́ nə̂ cəŋnyə nə́ tsə̂ tsyə́, ntó' mɔ́de ntámdzǝ ɔ, bǝ́ jyə́ gaə̂ ŋkâ' bǝ́ á yɔ̂gɔ́, tǝ sɔmmo lǝ pǝ́ nǝ̂ ghɔ dǝ́ ywǝ́. 

Cyǝpɔ Yésô, pyǝ̌ kam mkwí'tǝ́ dzǝ̌ ò

Wu yǝ o lǝ kuŋ wɔ́k tǝ míŋ á, ô bǝ́ dyǝ̂ kaktʉɔ̀, fo' pǝ píŋtǝmpfʉ́, mku'nyǝ̌ bû. 
Wu yǝ ô ŋké mghɛmhɔ lǝ́ gǝ wáp vɔ̂k á, mkunyǝ̌ bû. 
Wu yǝ ó tyǝ̂' ɔ há fʉ' píŋtʉ́m bí pyǝ á, mku'nyǝ̌ bû. 
Wu yǝ ô ntamtǝ mpfaǝ́sî pɔ́k nǝ̂ msyanyǝ gô' o á, mku'nyǝ̌ bû. 

Pǝ ywɔ́k dǝ́ â ŋkuŋnyǝ shwǝ́ nǝ́ yǝŋ cúsǝdê sɛ̂sǔ. 

A lǝ pǝ̌ cwǝbɔ́ɔ Yěsô ghɔ̂m bí pǝ̂ŋkʉ̂ pyǝ́ gaǝ̂ : «Pû gɔ sɔ' támbú nǝ́ po nǝ́ŋ lǝ wɔ́ yɔ́gó'; pû gɔ tí sá' wɔ́ ntʉ́m msinagɔ̂gǝ nǝ́ŋ ma' wɔ́ cɛ́ mla' tsô tsaǝ̌... Kwa' mtâ pɔ́, mfǝ̂ pɔ́, tuŋdyǝ̂ yɔ̂ ba msô pɔ̂ gɔ tí fiŋ wɔ́, tǝ ghǝ̌ pú̈ zhwǝ́tǝ̂ shǝ́pɔ cǝcǝ̌ po. Guŋ pɔ awɛ́ gɔ tí pɔ wɔ́ mla' tsô tsaǝ̌. Tǝ̂ bâ ta' nǝŋ lǝ ghɔ́ pí thǝ́ po. Pǝ̂ kaktʉɔ yɔ́ nê gɔ tí ghǝ tǝ́ po vɔ́kɔ́.»

Buŋbuŋ wénésǝdê gɔ̂sʉɔ̌ bí po lǝ́ o ! 

Cyǝpɔ̂ gɔ tí vɔk bǝ́ŋ yǝ ê nteŋ é â ba gɛghǝghʉɔ tǝco'nǝ̂ tsʉ'. 
Ê gɔ sɔ' sɔ́lám nǝ̂ pwǎŋko ba bǝ̌ŋ, bǝ̌ŋ yǝŋ yǝ ê nǝ́ŋ gǝ́ vɔ̂k. 
Bwǎnyǝ́ bî Cyǝpɔ Sî yɔkpǝ̀, da' yʉ́ nê ntɔ́m msyànyǝ̀. 
Bwǎnyǝ̂ tǝdhǝ pǝ́ nǝ̂ tsǒ ghámtǝ tsyǝ́, guŋ dǝmcǎ' ló nǝ́ ghámtǝ e ! Amen,  Amen.  

 Cyǝpɔ ghǝ́ pǝ ywɔ́k jú' â pǝpuŋ nǝ́ yǝŋ tɔ́sǝdê dzǝ̂mtɔ̌! 

Yaǝ zhûŋ fǝ́ bî Cyǝpɔ yǝ e lǝ ghǝ kɛbǝŋ ba cǎ'. 

Gaǝ̌ wǝ́ má' mnyǝ́ dé mkúŋ, tǝ yaǝ zhuŋ gɔ fǝ́ m hǝ́lǝ̂ ? 
Yaǝ zhûŋ gɔ fǝ́ bî Cyǝpɔ yǝ e lǝ ghǝ kɛbǝŋ pû cǎ'. 
Ê kɔ́ kwǝ ó nǝ́ tyà, á tâpɔ́m o pɔ́m nǝ́ tî ! 
Cyǝpɔ tâpɔ́m ò, Cyǝpɔ mpfɔ́ptǝ ô ntíŋnyǝ́ bǝ́ŋ ò. 
Pǝ̂ nam lǝ tyǝ́ ó mɔ́kcʉ́, pǝ́ mǝ́ŋwǝ́ lǝ nǝ́ŋ hwé ó ntyàtǝ̀. 
Cyǝpɔ̂ gɔ pɔ́mtǝ́ ó nǝ̂ guŋ cwǝpuŋ awɛ́, ê gɔ lwɔ' vɔk ó. 
Cyǝpɔ̂ gɔ pɔ́mtǝ́ ó cwǝ nǝ́ghɔ ba cwǝ nǝ́pìŋ, cwǝlɔ, ba nǝ̂ cwǝyǝ a tǝ́lá' mi á pǝ́. 

Buŋbuŋ fǝládê ntâmgǒ bí po lǝ́ o ! 

A lə pə̌ cwəbɔ́ɔ, Yěsô síŋ pə̂ŋkhʉ̂ pyə́ gaə̂ : "Po nə̂ cwə̌ bɔ́m tʉ̂m tsɔ́ nə́ pwâ dzə̌ tsə̂ nwə̂nwə̌, bɔ́m nə́ pâm pú a nə́ nîŋ thə̂ yɔ́ nə́ də́kdák, tyə̌'dzʉ́ bɔ́ɔ sɔ̂' bvʉ́ də̌m po pâ' ŋkhəvʉ́m á tə po bə́wə́ byáp; â gɔ sɔ' pfyə də̂m guŋ pəcwə́ sîcǎ'. Po nə̂ cwə́ bə́ byáp nə́ŋ shwyə́'nyə́ Sí pə́ tə yâ', jyə́ á po wim gʉ̂' nəbvɔ́k guŋ mnwə myə á wə́ sɔ́' á, píŋ sɔ' tíŋnyə́ dzə̌ Mú mo pə̂ də́ŋdəŋ."

Pə nə̂ cwə̌ sásǝdê tyǝ̌'pfô ɔ bə́ byáp : mghǒ cwəlɔ ŋwák á pâ' shǔŋ á, nə́ŋ də́ pə́ tə̀ kèŋ.

La'tǝ ghámtǝ o bî guŋ pɔ awɛ́! 

Ghǝ̌ pɔ pyǝ poapú lǎm ju'tǝ́ á zhyǝ́ ó : á wáp yɔ́ vɔk ó bíŋ tsô tsǔ. 
Á pú cyányǝ́ Buŋŋkʉɔ nǝ̂ guŋ mtsʉ' awɛ́, jyǝ́ á guŋ pɔ awɛ́ tiŋ mjyǝ mǔ. 
Lǝ́ ŋkuŋnyǝ o sá vɔk yɔ́k, jyǝ́ á pyǝ lǝ puŋtʉ́m fa' bú u pǝ́ tǝ pwâ. 
Pɔ́mtǝ́ lǝpʉǝ yǝ o lǝ vonyǝ nǝ́ pyǝ á, â ghǝ́ pyǝ pǝ́ sɔ́lám nǝ́ mfǝ̂ pɔ́k. 
Cwǝyǝ o gɔ tí sɔ' nǝ́ sâ' pɔmtʉɔ ba mpfaǝ́sí á, lǝ cɔ́mmtso má' mnyǝ́ nǝ́ pyǝ. 

 Cyǝpɔ pfɔ́ptǝ́ wɔ́ ntʉ́m yǝŋ gap mɔ́de dzǝ̂dzǝ lǝ́ o ! 

Sɔ́' m Cyǝ̀pɔ̀, sɔ' bvɔ́k  wɔk! 

Vɔk yɔ́k, mŋaknyǝ mɔ̂k ba yɔk nǝ́pǝ̂ bǝ́ m bû, ví'nyǝ́ mku'nyǝ ba cɔ́mmtso ntʉ́m mtʉ̂m mɔ́k. 
Ô bǝ́ á bǝ̂ŋ bâwaǝ̌lǝ́ cǝcǝ̌ pyǝ, ghǝ̌ pɔ pyǝ wâp shǝ́ŋ ó á yɔ́ ó. 
Sô mpǝ̂ŋ ba dɔ́mdɔm pɔ pyǝ wâp shǝ́ŋ ó á, lǝ wɔ́k gǝ́ pǝcǝ̂ŋ lǝ̀pʉǝ̀, mcwiŋkʉɔ ŋwɛ́nyǝ̀ ò. 
Ô ŋkuŋ vɔ̀k, o latǝ ghǝ́ vʉ́ : té wɔ́k msǔŋ vʉ̂ màmà, wɔ́kpyǝ a pɔ pyǝ wáp lě ntámdzǝ áá. 

Buŋbuŋ cúsǝdê ntâmdzǝ bí po lǝ́ o ! 

Mfǝ̌mfǝ́, po tǝ̂ jaǝ mghʉɔ kǝ mcyǝjyǝ pǝ́, pô bǝ́ pó á tǝ̂m dɔ̂lɔ̌, pǒ tuŋdyǝ́ Sí nǝ̂kǝ́lǝ́, â bǝ pú lě níŋ wɔ́ tǔŋ pǝkwǝ́ pa' yǝ cyǝ̂ ê jó'nyǝ́ nǝ́ Mcwiŋkʉɔ pú a mghǎmdó', gwo' phǝ́pa' nǝ́ŋ bǝ́ á kwa' Yéso Krǐsto áá. Â shyǝ m nǝ́ ê guŋ pa' tǝ́msí munyǝmunyǝ, jí cwyǝp dɔ̂lɔ̌ dzǝ̂ Cyǝ̀pɔ̀. A kwî' shyǝ́ â m nǝ́ ê ba wɔ̂ yɔ́ zhí tsǝ̂ nǝbǝ́m, pó'o shyǝ́ m nǝ̂ Zhwenyǝ Dɔ̂lɔ̌ jí tsʉ'shwǝ́ Sí.

Po ywɔ́k pǝpúŋ nǝ́ yǝŋ wénésǝdê sɛ̂sǔ! 

Mfǝ̌mfǝ́, po pǝ̂ byáp Cyǝpɔ po kǝ̂ lǒ'nyə́. Po lé dzʉ̂'ne tǝ́ jɔ́ : e tǝ̂ bǝ́ byáp mtʉɔdǝŋ tsǝ́ tsyǝ ê dǝ dǝm ne á dó'nyǝ́ pǝ́, tǝ ŋkǝ́m cwǝ yǝ ê dǝ dzǝywǝ̂ ba mlaktǝ myǝ́ áá. Lǝ̂ ba wɔ̂ yɔ́, po cwǝ́ á tǝ lo'nyǝ̀, nǝ́ŋ ntɔ́m tʉ̂m tsɔ́ nǝ̂kǝ́kǝ́, cwǝ yǝ Cyǝpɔ gɔ nwak á wǝ́ nɔ́tǝ́. Po lé tǝ́ jɔ́ : fyǝ'shɛ̌  ŋwak todyǝ́ pǝ̀. 

Buŋbuŋ tɔ́sǝdê gɔ̂sʉɔ̌ bí po lǝ́ o !

 bə́ dzə̂ Cyəpɔ, ta' tyə̌'dzʉ́ pə́ shwə́ pâ' mgu' shǎ' á, mgu' shǎ' pîŋ bə́ shwə́ pâ' ta' tyə̌'dzʉ́ áá. Cyəpɔ tə̂ dzonyə nə́ tɔ̂m mka'nyə myə́ pâ' shə́pɔ̂ ŋkwɛ á pə́ ; â du á nə́ thə̂ yɔ́ tə́ e lə pə́ dó'nyə́ ; nə̂kə́lə́, e ka píŋ nə́ tâk gaə̂ shə́pɔ tə́m nə́ po bí ; ê shə́ŋ m gaə̂ bəwaə̌lə́ wím cwə nəbʉɔ́ tʉ̂m tsyə́.

Bapâ' Cyəpɔ tə̂ dó'nyə́ á, pə ló'nyə́ shə́ jyə bî mcǔŋ nǝ́ yǝŋ fǝládê dzǝ̂mtɔ̌!

Israɛ̂l, cǝŋtǝ jú' : Cyǝpɔ Sî yɔkpǝ̂ bǝ́ da' dǒ é. Ô gɔ kuŋ Cyǝpɔ Sî o nǝ̂ guŋ tʉ̂m tsǔ, nǝ̂ guŋ ghɛnyǝ ô ba nǝ̂ guŋ yu gʉ̌'. Mco' mɔ e gaǝ̌ wǝ́ há bû tyǝ́' ɔ á, ó gɔ vó má nə́ tʉ̂m tsǔ. Ó gɔ pǝ́ cwi'tǝ má lǝ́ cwi'tǝ bî pôsǝm pǔ, piŋ pǝ́ kámtǝ́ má dǝŋtyǝ́', kǝ ǒ m dyǝ̌ o, kǝ m ŋkǝ́kà, kǝ ǒ m kǒlwɔ́k, kǝ ǒ lu á kó lǝ̂.

Ywɔ́k ŋkámtǝ́ sásǝdê ntâmgô ɔ gaǝ́, o pə̂ á kólwɔ́k, kə bə́ â m pě lə̂, o zhyǝ́ nǝ́ cwâfʉ̌. 

Sǐ la tǝ̂ shwó' wɔ́kpǝ gaǝ́ pǝ pə́ jɛ́lúŋ pǝ́; a lǝ̂ bǝ́ m gaǝ́ pǝ cyǝ́ m nǝ̂ Cyǝpɔ yɔkpǝ Yéso Krǐsto ŋkó ntʉ́m vɔ̀k, yʉ́ yǝ e lǝ pfʉ̌ nǝ́ thǝ̂ yɔ́kpǝ nǝ́ gǝ gaǝ́ papú pǝ́m bvɔ́k, kǝ cwǝyǝ pǝ̌ wǝ́ dí á, kǝ cwǝyǝ pǝ tǝ̌ wǝ́ dí á lǝ̂.

Pə ghyə́ lɔmnyə́ gho ntʉ́m yǝŋ gap mɔ́de shyǝ̂ŋkǔ', â Sǐ té wɔ́kpə msûŋ vʉ̌.

Pǝ̌ wǝ́ byáp nǝ́ yɔ̂ pâ' Cyǝpɔ yɔkpǝ Yéso Kristo gɔ la'tǝ nǝ́ e áá. Yʉ́ nê gɔ sɔ' ghǝ tǝ́ pǝ tɔ́m mama gíŋ tǝ ŋkó, bíŋ bǝ́ tǝbya nǝ̂ tyǝ̌' Cyǝpɔ yɔkpǝ Yéso Krǐstò. Nǝ̂kǝ́lǝ́, Sî bǝ́ tǝfɛjʉ̀m, yʉ́ yǝ e lǝ kě wɔ́kpǝ gaǝ́ pǝ a Mû e pǝ́ shwǝ́ ntamtǝtamtǝ áá. 

 ŋkuŋnyǝ Sǐ ywɔ́k ntámtǝ́ wɔ́kpǝ nǝ́ yǝŋ cúsǝdê dzǝ̂dzǝ boo ! 

Yěsô lə lə̂ ghɔm cwə bɔ́ɔ : "Po sɔ́' bə̂m, guŋ wɔ́ pyə ŋkə̌m wə́ dzaə́ wɔ́ á, â n há hwítə bí po. Po mâ' yaə kə́ló' ntúŋ po; po zhí pə̂ŋkʉ̂ pə̌ nə̂kə́lə́, â bə gaə̌ pyányə́ bíŋ bə́ də́ nə̂ a sí; po ghə pô' bə ghɛnyə yɔ̂ gɔ yú' hwítə̀. Éé, yaə kə́ló' ka tʉɔ́ nə́ kwà; ŋkəm á tə̂ dzaə pə́."

Buŋbuŋ wénésǝdê ntâmdzə bí po lə́ o ! 

Kə pə yaə̌ á thə́, kə pə̌ pfʉ́pfʉ́ lə̂, pə̂ bə́ â da' bî Cyə̀pɔ̀ ! 

Cyəpɔ cyətə yǎp pú nǝ̂ pa', bə bə̂mpa' bó pə̂ ně; Cyəpɔ cyətə pyǎp tísuŋ, bə mpyǎptsʉ' ne bô yáp pó.
Ô dó'nyə́ tǝ shyə́ dzʉ́, ŋkə́ŋnyə́ nə́ hwítə̀, dzʉ́ cəŋ ghə̀ghʉɔ̀ : pô' Sǐ nǝ́ŋ bǝ́ ŋkwíŋ mokuŋ e ntʉ́m lwɔ́k.
Buŋtsê bə́ mûjɛnə́ yə é su ntî mkɔ mɔ ntʉ́m bvɔ̂ e ! Pú a mghɛbo páp yu', bə pə̂ sǒ lə kú wáp. 

Buŋtsě tɔ́sǝdê sɛ̂sû ɔ, bə́ mo yə ě zhyə́ nə́ cə̂jyə bî bɔ̀nyǝ̀, bɔ́mtǝ́ mfǝ̂ pyǝ́, tə ywǝ́ lə nǝ̂ kam sɔm bə é zhyǝ́ nwǝ nǝ́. 

Buŋtsê bə́ mo yə ê jó' nə̂ e nə̂ Cyə̀pɔ̀.

Buŋtsê bə́ mo yə pú a bâpbáp pɔ tə̂ ŋwanyə, mo təpə̌ dzə́ mkwə pɔ̀ cwə̀pùŋ, pú a pə kó'suŋ lə pə́ páp, da'gaə́ bə́ ŋwɛ́nyə́ nə̂ mco' Cyəpɔ, bíŋ bə́ jʉ́m má mɔ́kcʉ̂ bà ntyàtə̀.
Ê shwə́ pá' shʉɔ̂thə̂ bə pú pá kə́ŋshyə, a pə́ jám cwəyə ǎ cə́ŋ á, mhwə myə́ pə́ shwə́ â mimnyəmimnyə ; e tô' bəyə́ kə́lə́, bə â shwə́ míŋ â pəpúŋ.
A tə pô' bí mò cwə̀pùŋ pə̀.
Nə́pá' wâp shʉ pâ' yəmtə́ mghé myə fəfǎ kwa nə́ gɔ.
 bə Cyəpɔ̌ zhyə́ jyə pɔ də́ŋdəŋ, da'gaə́ mə̂jyə pɔ cwəpuŋ pə́ gɔ sɔ' kəm.

Buŋbuŋ fǝládê gɔ̂sʉɔ̌ bí lâ'lǎ' ! 

Cyǝpɔ Yésô, sɔ'ɔ́ ! 

Ghǝ̌ pyǝ lǝ́ tɔ́mnǝ́, dǝ́ŋdǝŋ ba tǝfɛjʉm ŋkwíntɛ́ mɔktǝ yɔk ntʉ́m yǝŋ dzʉ̌. 

O lǝ̂ sɔ' nǝ́ zhwyǝ́tǝ pɔ pyǝ wáp wǝ́ jwíŋ : ghǝ̌ pyǝ pǝ́ shɔ́mnyǝ́ mghǝghʉɔ mɔ́k. 

Nǝ́ pyâp tyǝ́' yǝ ô gɔ sɔ' sá' pɔmtʉɔ ba mpfaǝ́sí á, lǝ cɔ́mmtso o ntǝ́mtǝ́ wɔ́k, gǝ́ pyǝ nǝ̂ cwǝ̌ bǝ́ byáp. 

A Cyǝpɔ ywɔ́k bɔ́mtǝ́ wɔ́ sásǝdê dzǝ̂mtɔ̂ ɔ, nté wɔ́ nǝ̂ dǝ́dák. 

Cyəpɔ̂, la'tə á jyə nǝŋkǝ́m nǝ́ ò !

Cyəpɔ̂, la'tə á mjyə mǔ, gə̂ n jyə́ mə̂jyə̀ ò.
Lə nyə́nyɔ̂ o shím á, zhí'tə́ á, nə̂kə́lə́, ô bə́ Sí yə ê bvɔk á.
Cyəpɔ̂, kámtə̂ yu pyányə̀, ŋkuŋnyə o yə â bə́ màmà.
Gʉ̂'pâ' bə ó puŋtʉ́m á, kə̂ tʉɔnyə á ntʉ́m ŋkuŋnyə o m Cyə̀pɔ̀.
Cyəpɔ̂ bə́ də́ŋdəŋ, bə é puŋtʉ́m, yʉ́ yə ê da'tə jyə bí pɔ̀ cwə̀pùŋ. Nyə́nyɔ̂ ê ntə́mtə́ pələnə́sí, ê gyə́' mə̂jyə e bí pələnə́sí.

Buŋbuŋ gap mɔ́de tyǝ̌'pfô bí po lǝ́ o ! 

Pyǝ̌ pú'bú m Cyǝpɔ ghámtǝ̀ !

Cyǝ m nǝ́ pǝpíŋtǝmpfʉ́ pyǝ wáp lǝ pǐŋ nǝ́ pfʉ̂ nǝ́ ŋkwíŋntɛ́ píŋtʉ́m á, 
_ há zhwenyǝ lǝpʉǝ bí pyǝ. 
Cyǝ m nǝ́ pǝpîŋtǝmpfʉ́ pyǝ wáp lǝ pfyǝ mcyǝ̂ máp nǝ́ shyányǝ́ tsô tsǔ á, 
_ há gʉ̂' píŋtʉ́m bí pyǝ. 
Cyǝ m nǝ́ pǝpîŋtǝmpfʉ́ pyǝ wáp lǝ tsǝ ó mǝ̂jyǝ bɛnyǝpɛnyǝ á, 
_ hâ yɔ́k kaktʉɔ cwǝ̀ mlǝ̀ŋtǝ̀. 
Cyǝ m nǝ́ pǝpîŋtǝmpfʉ́ pyǝ wáp lǝ sɔk mdzǝ̂ máp ntʉ́m mcyǝ Mûjʉ Sǐ á, 
_ gǝ̌ pyǝ tʉɔ́ shyǝ mlǝŋtǝ sîcâ' ɔ. 

Buŋbuŋ cúsǝdê shyǝ̂ŋkǔ' bí po lǝ́ o ! 

A lǝ pǝ̌ cwǝbɔ́ɔ, Zhâŋ Hâshyǝ tǝ́m pǝ̂ŋkʉ̂ pyǝ́ pǝ́pʉǝ́ gaǝ́ wáp ghɔ́ hǝ́ŋ Yěsô gaǝ̂ : «Ô bǝ́ mo yǝ ě wǝ́ sɔ́' á, kǝ̌ pyǝ pyáp â mu' mò ?»... 
A tó' cwǝ ó, Yěsô yɛ̂ mgho nǝ́ pɔ tǝ jɔ́m, jɛ́ mkò'tǝ̀, jɛ́ pɔ pyǝ a lǝ̂ bǝ mzhwenyǝ cwǝpǔŋ kwǝ́ wáp á, biŋ gǝ̂ mghɛfʉ tǝ jɔ́m yɔ̂tsʉ'. E lǝ pǐŋ ba' bî mghɛntǝ́m pɔ gaǝ̂ : «Po ghɔ́ síŋ Zhâŋ ywǝ́ yǝ po jɔ́ bíŋ jú' áá : mghɛfʉ wǝ́ jɔ́tsʉ', mko'tǝ pǝ́wǝ́ gíŋŋ́, mghɛka'pǎp lɔ́, bǔ'mtǝ̂ŋ yû'nwǝ̀, mpfaǝ́sí yámnǝ̂vʉ̌, mpǝ̌ŋ yû' Ŋkʉɔ Pǝpúŋ. Buŋtsě sí bǝ́ mo yǝ e tǝ gɔ kotǝ á mla' mǝ̌ ! 

Buŋbuŋ wénésǝdê dzǝ̂dzǝ bî mfǝ̌mfǝ́ ! 

Sɔ́' m Cyǝpɔ Yésô, sɔ́' m nyǝ́nyɔ̂ Sǐ !

Wu yǝ mghǎmdó' lǝ phǝ̌ gaǝ́ pú gɔ tsǝ́ ó á, 
ghǝ̌ ywǝ́ yǝ o biŋ ntwóp nǝ́ pyǝ á kwyǝ́. 
Wu yǝ o lǝ sɔ' nǝ́ yɛ mtʉ́m myǝ á wǝ́ jwíŋ á, té pɔ pǔ nǝ̂ mzhwîŋ máp. 
Wu yǝ o lǝ sɔ' nǝ́ hap mla' dǝmcǎ' pú a Sǐ á, kǝ̂ tǐ dǝ́ mhɔ ntám wɔ́k tyǝ́' yǝ ô gɔ sɔ' fyǝ' monǝŋ áá. 

Pǝ ló gaǝ̂ Sǐ támdzǝ nǝ́ yǝŋ tɔ́sǝdê ntâmdzǝ. 

La'tǝ ghámtǝ o bî guŋ pɔ awɛ́ !

Cyǝpɔ̂, la'tǝ nǝ́ o bí pɔ pyǝ wáp lětǝ tíŋ ó : â vɔk ó kyǝ́' wáp. 

Á tsô tsǔ ghɔ́ tǝ ŋkǝ́m nǝ̂ guŋ bhǝ́dzʉ́ dǝmcǎ', â ghǝ̂ guŋ pɔ awɛ́ zhyǝ́ mpimjyǝ mǔ. 

Wu yǝ o lǝ zhi sɔ́' nǝ́ vɔk dǝmcǎ' á, piŋ sɔ́' dónyǝ́ fa' tsǔ. 

Wu yǝ ô shǝ́ŋ gaǝ́ monǝŋ wím lǝpʉǝ á, tɔk mkǝ́ló' myǝ â shǝ́nyǝ́ wɔ́k. 

Wu yǝ pú lǝ tsǝ̌ ó ntʉ́m bâpnǝ̂ yɔk, bíŋ bǝ́wǝ́ gɔ́ sɔ' nǝ́ fyǝ' monǝŋ á, lǝ mpfaǝ́sí ŋkó nǝ̂ mcwǒ'fà' màmà. 

Buŋbuŋ fǝládê sɛ̂sǔ bí po lǝ́ o ! 

Sɔ' bvɔ́k pɔ pǔ m Cyǝ̀pɔ̀.

Wu yǝ o lǝ ka'nyǝ ta' Ntǝ̂msî nwǝ dǝ́ŋdǝŋ bí pɔ pǔ á, ghǝ gaǝ́ hwítǝ sá' gô shù. 
Lǝ́ Zhwenyǝ ó gǝ́ pyǝ twóp m sǝ́; lǝ wɔ́k gíŋ tǝ ŋkǝ́m nǝ́ cɔ́mmtsò ò.
Há tʉ́m tsyǝ pǝ́ a yû' nwǝ á bí pyǝ̌, â nyáptǝ́ wɔ́k nǝ́ yû' Ghɔm tsǔ. 
Piŋ ŋkwí' gʉ̂' yɔk m Sî buŋtʉ̌m, tǝ ŋkǝ́m tyǝ́' yǝ Cyǝpɔ Yéso Krǐsto gɔ sɔ' áá.

Cyǝpɔ̂, ghɔ́ jwɔ́k nǝ́ yǝŋ sásǝdê gɔ̂sʉɔ̌, há tʉ́m tsyə pə́ á yû'nwə á bí pyə ! 

Sɔ́' m Cyəpɔ Yésô, sɔ́' m gwyà vɔ̀k !

Ǎ puŋ gaə̂ dəmcǎ' lə́ ó m gwya nwə dəŋdə̀ŋ, á ghámtə o cwə́ nə́ câ' tsɔ́k. 
A lě shyə m nə̂ ŋkuŋnyə o nə́ pyə, o zhyə̂ yǔ pwâ yə â bə́ nə́ wɔ́k pɔ̀mnə̀ŋ; lə gʉ̂' Sǐ yə â bə ó ghə á nə ŋkwítə́ mònə̀ŋ.
Ghə̂ ŋkyə'nyə zhyə̌nwə ó kyə́' pɔ pyə â bə jʉ̂m kəkʉɔ̌ kwə́ wáp.
A lě shyə m nə̂ yu lənə́sí, o lə̂ mfʉm mɔ́k gə̂ mǔ; pá' ǒ ntʉ́m ghámtə cwəlɔ á, níŋ byányə̂ ó nə́ pyə.
Ô gɔ tí la'tə nə̂ o cwə jʉɔjʉm sǎ'; lə mpfaə́sî pɔ́k gíŋ tə ŋkó ntʉ́m Nəfo kɛbə̀ŋ.

Sɔ́' m Cyə̀pɔ̀ ! Sɔ' ntʉ́m yǝŋ gap mɔ́de ntâmgǒ, síŋ wɔ́k thǝ̂ nǝntǝ́m ! 

Po kǝ̂ pǝ̌ já'shɛ tǝ wɛ fyǝ́'ǝ́; da'gaǝ́ po pyáp gaǝ̂ Cyǝpɔ sɔ́'ɔ́, nǝ̂kǝ́lǝ́, ê gɔ kyǝ' ywǝ́ yǝ â bǝ pú tʉm tǝ ntʉ́m jʉ́m á, piŋ ghǝ̌ pú zhyǝ́ mkwɛnyǝ myǝ á tǝ ntʉ́m ntúŋ lǝ. Áá pǝ́ pô'ó, Sǐ hâ yǝ ghámtǝ bǝyá mo á bí í.

Buŋbuŋ wénésǝdê shyǝ̂ŋkǔ' bî guŋ mfǝ̌mfǝ́ !

Cyǝpɔ Sǐ ghɔm gaǝ̂ : Ǎ yǝŋ m bǝ́wǝ́ shyá dimŋkʉɔ a gaǝ́ ê nyáptǝ́ jyǝ bǝ̂m; mûdâ' Cyǝpɔ yǝ pó a shǝ́ŋ é sɔ́' ŋkó Cwyǝ̌p é... Gaǝ́ gɔ cya gámdó' Elî bí po tǝ̂ tyǝ̌' Cyǝpɔ ŋwákǝ́, mǝ̂ tyǝ̌' pwɔ̂k. Ê gɔ ghǝ̂ mtǎ píŋ sɔ́lám nǝ́ pô páp, â ba lǎm pó píŋ sɔ́ nǝ́ mtâ páp, bwɔ́k pâ' gaǝ sɔ' má' do cwəpuŋ ntʉ́m gùŋ.

Á hwítǝ Cyǝpɔ pǝ́ m wɔ́ nǝ́ yǝŋ fǝládê ntâmdzǝ lǝ́ o ! 

Sɔ' bǝ́ m wɔ́k m Emánwɛ̂l ! 

Ô Krǐstò, wu yǝ o lǝ sɔ̌' pǝ pǝ́ shwǝ́ á, pʉ́'tǝ́ wɔ́k bíŋ ntwóp wɔ́k m sǝ́ nǝ́ gǝ múhwǝ́ ò. 

Wu yǝ pú lǝ tsǝ̌ ó gaǝ́ ô sɔ' síŋ Buŋŋkʉɔ bí monǝŋ á, hâ yɔk píŋtʉ́m dǝŋ nǝŋkwí yá. 

Pyǝ̌ wǝ́ sʉ́m nǝ́ yɔ̂ sǝ̂ ó : ghǝ̌ pyǝ ŋwɛ́nyǝ́ pâ' da'dǎ' pú tsǝ́ ó. 

Bwǎnyǝ́ bû, nǝ́pá' ô sá' guŋ pǒtsǝ́ : ghǝ̌ pyǝ pǝ́ mɔ́ktǝ́ nǝ́ sɔ' ŋkó ntʉ́m ŋkyǝ̀'nyǝ̀ ò. 

Buŋbuŋ sásǝdê sɛ̂sǔ bí po lǝ́ o ! 

Sî bǝ́ ŋkyǝ̀'nyǝ̀; sɔm jʉ́m tǝ̂bǝ́ nǝ́ é pǝ́. Pǝ pǝ̌ giŋ ntʉ́m ŋkyǝ'nyǝ, dǝ́ŋdǝŋ pá' kwa' yʉ̂ bǝ́ á ntʉ́m ŋkyǝ'nyǝ á, bǝ ŋkwishwǝ̂ gɔ pǝ́ cǝcǝ̌ pǝ̌, mcyǝ Mû é Yésô nǝ́ŋ sɔ́k guŋ mhɔ mɔ́Kpǝ̀. 

Buŋbuŋ gap Krǐsimɛ̂ bí po nǝ́ yǝŋ mɔ́de dzǝ̂mtɔ̂ booo ! 

Pyɛ̂r pú Zhâŋ lǝ ghɔ̌m dzǝ̂ cam mkâmvʉ̂ʼ a Zhwîf gaǝ̂ : Ǎ puŋ mnyǝ̂ Sǐ nǝ́ yû' á wɔ́, shyǝ́ nǝ́ yû'nyǝ Sî a ? Â yɔ́ shɛ. Mpá' wɔ́k á, pǝ̂ sɔmywǝ́ lǝ kɔ́ wɔ́k nǝ́ sîŋ ywǝ́ yǝ pyǝ kǝ yɔ̌ bíŋ jú' áá. 

Pǝ ywɔ́k cúsǝdê ntâmgô ɔ, nták ŋka'tǝ yɔ́kpǝ da' bî Sǐ, dzǝ́ tǝ bîŋ bǝ pǝ̌ píŋ. 

A lǝ̂ dú á kwa' nǝ́ mcǝ̂ŋ mɔ́kpǝ, tǝ́ yɛ́lúŋ ghɔ̂ kó nǝ́ pǝ â dǝ́ŋdǝŋ pá' guŋ pyǝshǝ́ pɔ áá. Da'gaǝ́ â bǝ cɔ́mmtso Sǐ yɔ́m gá'bú; â shyǝ m nǝ́ mǝ̂ ŋkuŋnyǝ yǝ e lǝ ghǝ nǝ́ pǝ̀, wɔ́kpǝ e pǝ lǝ̂ dzǝ̂ pǝ̌ â mpfaǝ́sí dúnǝ̂ mhɔ mɔ́kpǝ á, e ghǝ̂ pǝ a Krǐsto pǝ́m jám nǝ̂ vʉ̌ : â shǝŋtǝ shyǝ́ â m nǝ̂ fʉ'sí tǝ́ po vɔ̂k. 

Buŋbuŋ wénésǝdê tyǝ̌'pfô bí po lǝ́ o ! 

Bwǎnyǝ́ bû m Sî tâcɔ́mmtsò! 

Wu yǝ ô ŋkuŋ gaǝ̂ guŋ pɔ awɛ́ vɔ́k á, pyǝ̌ gho'tǝ ó pá' o lǝ hǎ ŋkwiduŋ Mû u bí pyǝ áá : _ lǝ pá' pú dzǝ́ é á gǝ̂ guŋ dǝmcǎ' ŋwɛ́nyǝ́. 

O lǝ cyǎ Mû u gaǝ́ ê sɔ́' shyanyǝ lǝpʉǝ bî mghɛcɛ́ bíŋ síŋ gaǝ̂ cwǝ byǎnyǝ́ kù' : _ zhɔ́k pfʉɔŋkǝŋ sîcǎ'. 

O lǝ lǝ̂ mzhyǝ̌nwǝ sîcǎ' gɔ́ tǝ mkǝ́m bǝ́ŋ Mú : _ tsʉ́ pwɔ' pɔ pyǝ wâp gámtǝ́ ò. 

Ô ŋké guŋ pɔ awɛ́ ntʉ́m puŋtǝ́ ŋkyǝ̀'nyǝ̀ ò : _ la'tǝ wáp jyǝ nǝgɔ́ bǝ́ŋ Mú pú mâp e. 

Cyǝ m nǝ́ ntǝ̂msî Bɛ́tlǝhɛ̂m, ŋka' ntǝ̂mntǝ̌m, _ dá'tǝ́ ghámtǝ o bî mfǝ̌mfǝ́ pyǝ o kǝ pǐŋ gaǝ́ wáp kó ntʉ́m hwítǝ̀. 

Pǝ ló gaǝ̂ Cyǝpɔ Tâcɔ́mmtso pfɔ́ptǝ́ wɔ́kpǝ nǝ́ yǝŋ tɔ́sǝdê shyǝ̂ŋkǔ'

Cyǝpɔ̂ dǝ pó gámtǝ tâ yáp, bǝ́ gǝ́ pǝ̂ŋkʉ̌ yú'nyǝ bí mâ yáp. Mo ghǝ mku' táp e, bǝ pû gɔ wá' mhɔ myǝ́, nǝ́ŋ gámtǝ́ máp e, bǝ ê gɔ pǝ́ pá' mo yǝ ê shú'tǝ́ mtɔ́kcyǝ áá. Mo ghǝ mku' táp e, bǝ pô pyǝ̂ gɔ lá' ghǝ̌ ê ŋwɛ́nyǝ́, tyǝ́' yǝ ě cwyǝ́'nyǝ́ â Sǐ yú'. Mo ghǎmtǝ táp e, bǝ ê gɔ ná' wóptǝ́ sîcǎ' ; mô jú'nyǝ́ Cyǝpɔ a hâ kaktʉɔ bí máp e. 
Mû wɔ̀k, tǝ́mtǝ́ tɔ́ ɔ cwǝyǝ ě vo á, bɔ́m nǝ́ ghǝ e zhwíŋ cwǝyǝ e yaǝ̌ ŋka' áá. E la bvóvo tǝ ntó' á nǝ́ zhʉ́zhʉm, wu yǝ gʉ̂' yaǝ̌ sí á, o kǝ̂ là', o pɔ́m nǝ́ wâk é,  nǝ̂kǝ́lǝ́, cɔ́mmtso yǝ ô gǝ nǝ́ tɔ́ ɔ á ka lá' shyǝ́ né; â gɔ tí pʉ́'tǝ̂ yu tuŋdyǝ́ cwǝyǝ cwǝpǔŋ pǝ́ gɔ́ sa'tǝ áá. 

Sɛnyǝ́ fǝládê dzǝ̂dzǝ bí po lǝ́ o !

Yésô, yɔk gʉ̂' ba yɔk hwítǝ̀, cɔ́m mtso mɔ́k. 

Nǝ́ tsǝ̂ o lě da'tǝ bí gwyamonǝŋ ntîpá' ô nǝ ŋkúŋ wáp : _ ghǝ̌ pyǝ nǝ̂ cwǝ̌ bǝ́ gó'tǝ́ ó. 

O lǝ̂ sɔ' m nǝ́ sîŋ monǝŋ gaǝ́ pú wá' mhɔ máp bíŋ ntɔk gwǝ ntúŋ pú : _ ghǝ̂ dǝŋ pɔ pyǝ wâp jú'nyǝ́ ó á yɔ́m gɔ́dzǝ̀.

Pá' o lǝ tǝ̌m m vǎm dɔ̂lɔ̌ Marî á, o lě dǝ nǝ̂ o gǝ́ fǝ̂ yɔk : _ zhí'tǝ́ monǝŋ nǝ́ tɔ̂m ŋkuŋnyǝ cǝcǝ̌ pú. 

O lě bví' dǝmcǎ' pâ' ŋka' tǝ vo' áá : _ ghǝ̌ po a mpfaǝ́sî pɔ́k cʉ́nyǝ́. 

Sɛnyǝ́ sásǝdê ntâmdzǝ bí po lǝ́ o ! 

Pɔkuŋ pǝ, â sɔ' m nǝ̂ mghǝ́tsó pyǝ wáp yaǝ̌ bhǝ̂fa' cǝcǝ̌ po, m bîŋ nǝ̂ pǝ̂ mu' nǝ́ pú, bǝ́ ŋkwîntɛ̌ nǝ́ gô' Krǐsto, yaǝ tsʉ' pîŋ bǝ́ ntʉ́m ghámtǝ yǝ ǎ wǝ́ sɔ́' á, m bǝ́wǝ́ gɔ́m bí pú gaǝ̂ : po pǝ́ mcyadzǝ́ Sí tsyǝ wáp wǝ́ po á, tǝ mo ntɔ́m wɔ́ tɔ́m, gǝ́ mpâ' Sî ŋkuŋ á, tǝ tǝ̌ŋnyǝ́ â ŋkapǝ́, dǝ́ á tʉ̂m pǝpúŋ, tǝ lǝ bʉ' sá' pɔ pyǝ Sî níŋ nǝ́ bû mɔ́ ; po zhí â mfo' nǝshwǝ́ bî vǝŋdzǝ́ Sí. Â pǝ́ pô'ó, Tâ mcyadzǝ́ cwǝ́ tǝ ŋwák, po wím ntî dwa ghámtǝ yǝ pə́ a lə pónyə́ áá.

Pə saǝ́nyǝ́ tǝ jí â mfo' ma pəpúŋ bí lâ'lǎ', ntʉ́m yǝŋ gap mɔ́de gɔ̂sʉɔ̌ ! 

Sî bǝ́ ŋkyǝ̀'nyǝ̀, sɔm jʉ́m lǝpǝ́ nǝ́ é. Pǝ pǝ̌ giŋ ntʉ́m ŋkyǝ̀'nyǝ̀, bǝpá' kwa' yʉ̂ bǝ́ ntʉ́m ŋkyǝ'nyǝ á, â bǝ pǝ̌ tamtǝ cǝcǝ̌ pǝ, mcyǝ Mû é Yésô pîŋ syáktǝ́ guŋ mhɔ mɔ́kpǝ̀. 

Pǝ pú'bú bí Sî Kǎmgó, ê lǝ́ guŋ pɔ pyǝ wáp mǝ̂jyǝ cúsǝdê dzǝ̂mtɔ̂ á, gɔ gaǝ̂ yap yap yap gíŋ tǝ ŋkó. 

Nyə́nyɔ̂ ba gʉ̂' fə́ da' bî Cyə̀pɔ̀.

Guŋ wɔ́ pyə pô shwə́ tə gʉɔ səsʉɔ á, po fɛ́ nǝ̂ yɔ dé á : pô gɔ sɔ' vɔk. Éé gaə̂ bǝ́ Sí : mu' sî dyǝ' tǝ̌ wǝ́ pǝ́ ! Pə́ kwa' myǝ é wə́ há mkɔ̀ : nwə də́ŋdə̂ŋ ntə́m m shwǝ̌ m̀, bə́ ghɔm tə tě jyə́. ''Bǎtsá kwí'tə́ â gɔ sɔ' kam dzǝ̌ m̀, bǝyá shwǝ á ŋá' há mkɔ gaə́, nyə́nyɔ̂ ba gʉ̂' fə́ da' bî Cyə̀pɔ̀ !''

Pə ywɔ́k nǝ́ yǝŋ wénésǝdê ntâmgǒ, fɛ́ nə́ dé Cyəpɔ̌, ê fɛ́ mnyǝ̂ mɔ́kpə nə̂ tsə́ ŋkà' : guŋ gʉ̂' awɛ̂ fə́ da' bí í. 

Zhyə̌nwə̂ bə́ ŋkyə'nyə ŋka' màmà, kyə' tə mviŋ nə̂ mfa' Sí, fǒto puŋtʉ̂m é. Pá' ê bə́ dyə́ dǒ é á, pə̂ ywə́ lə cyə́ é; ê shwə́ á ŋkwi tsʉ' gə̂ dzʉ̌ twóp m sə́. Nə̂ gu' nə gu', ê gaptə bí mtʉ̂m dɔ̂lɔ̌, a lə̂ wáp gə́ mghámdô' ba msǒ Sí.

 Sǐ kyə́' zhyə́nwə yɔ́kpə̌, pə ywɔ́k jyə́ nə́ ló'tə shə́ mnwə nə́ yǝŋ tɔ́sǝdê tyǝ̌'pfô 

"Cʉ́' nǝ́ yâk zhyǝ̌nwǝ mo yâk ŋkapǝ́".

Mpuŋtsê bǝ́ gwya pɔ pyǝ wâp shǝ́ŋ ó 

Nǝ́ yǝŋ tyǝ̌'dzʉ́, pɔp sǝ́ sɔ' dǝmcǎ' : _ saǝnyǝ dzʉ́ â héjyǝ bî puŋtʉ̂m ó ! 

Ghɔ̌m sîcǎ' tyǝ̂' ɔ bǝ́wǝ́ gíí : _ lǝ Gi vɔk o gǝ̂ dǝmcǎ' píŋ ntwóp m sǝ́ ! 

Nwǝ dǝ́ŋdǝ̌ŋ tyǝ́' ɔ bǝ́wǝ́ sɔ́' m nǝ́ fyǝ' mtʉ̌m : _ súŋ cwǝpuŋ nté, pyǝ lá'tǝ́ ŋkùŋnyǝ̀ ! 

Ywǝ́ yǝ pú lǝ pyǎp fǝ́ mǝ̂kukú gu' á yǝŋ bǝ ǎ ŋwàk : _ ghǝ̌ pyǝ yɔ́ ŋka' ŋkyǝ'nyǝ o nǝ̂ yɔk cwǝdzʉ̌ ! 

Ǎ tyǝ̂' ɔ bǝ pú ka'nyǝ Lunǝ̂vʉ̌ bî gwyà mònǝ̀ŋ : _ ghǝ̌ pyǝ yɔ́ msyanyǝ zhyǝ́nwǝ ó !

Nǝ́ yǝŋ fǝládê shyǝ̂ŋkǔ', pǝ ywɔ́k shǝ́ŋ nǝ́ zhyǝ̂ msyanyǝ Cyǝpɔ nǝ́ pǝ̀. 

A lǝ pǝ̌ cwǝbɔ́ɔ, Pyɛ̂r ŋwâk wǝ̂ mu' tâdyǝ̂ msǝ̌ŋwi pǝ Róma gɔ́m gaǝ̂ : «Kwa' nyǝ́nyɔ́, gaǝ̌ zhyǝ́ cwǝlɔ gaǝ̂ Sǐ tǝ̂ ŋkyak mò pǝ̀ : ê dǝ bǝwaǝ̌lǝ́ yǝ ě nǝ̂ pwɔ̌k ê mfa' myǝ́ pǝ̂ dǝ́ŋdǝŋ áá. Tsɔ̂ ghɔm tsyǝ e lǝ nǝ̂ tim bî pǒ Israɛ̂l, shyǝ́ m nǝ̂ Yěso Krǐstò, yʉ́ yǝ ê bǝ́ Cyǝpɔ guŋ pɔ awɛ́ á, nǝ shyányǝ́ buŋ ŋkʉɔ hwítǝ áá.  

 Cyǝpɔ ghǝ́ pǝ lǝ́ hwítǝ ntó' yǝŋ gap mɔ́de sɛ̂sǔ !

Pɔkuŋ pə, po yɔ́ gʉ̂' ŋkuŋnyə yə Tá lə ghə nə́ pə, jyə́ á pú ké wɔ́kpə gaə̂ pǒ Sí_pə̂ nə́ŋ bə́ wáp. Pɔkuŋ pə, ntó' fə́ cwəlɔ̌, pə̂ bə́ pó Sí, tə̂ bə pə ka wɛ́ jyə́ pá' pə̂ gɔ tí pə́ lə. Pə̌ zhyə́ nyə́nyɔ́ gaə́, tyə́' yə Mû Sî gɔ tí la'tə nə̂ e á, pə̂ gɔ pə́ á pá' yʉ́ á nə̂kə́lə́, ê gɔ cəŋtə pə́ á pá' ê bə́ lə. 

Gʉ̂' ŋkuŋnyə yə Sî gə nə́ pə á, pə ywɔ́k nǝ́ yǝŋ cúsǝdê gɔ̂sʉɔ̌,  gə́ â dǝ́ŋdǝŋ yá nə́ mfə̂ pɔ́kpə̀.

"Mo kuŋ shwanwǝ bǝ ě kuŋ shúŋ".

Nə́ pə̂ shwə́ á Dyə̂ Cyə̀pɔ̀.

Cyəpɔ̂ bə̂ yaə ŋka' bíŋ bə̂ yaə̀ vɔ̀k; tə gaə̂ gɔ pwɔ́k waə́ ?
Cyəpɔ̂ bə́ khʉ̂' yaə̀ vɔ̀k; pə̂ n tíŋnyǝ dzə̂ waə̌ sə́ŋŋ́ ?
N dě dó ta' ywə́ bî Cyəpɔ, a pə̂ da' yə gaə̂ shə́ŋ áá : nə́ ghə bə́ á dyə̂ Cyəpɔ tə dá' mpfʉ́, bə́ díŋtə̂ yə nə́twa təfo', bíŋ jó'nyə́ nǝ̂ to Cwyə̌p é.
Kwa' nyə́nyɔ́, gaə̂ gɔ sɔ' yɔ́ gʉ̂' ŋkuŋnyə Cyəpɔ nə̂ cǎ' pɔ̀mtʉɔ̀.

Pə ló gaə̂ Cyəpɔ ywɔ́k bǝ̂ yɔkpǝ khʉ́', nǝ́ yǝŋ wénésǝdê dzǝ̂mtɔ̌. 

 bǝ́ fa' bí wɔ́kpǝ mghɛgʉ́', nǝ́ tǝ́mtǝ mpwǎŋko, ba nǝ́ cyǝtǝ tǝ̌ŋnyǝ́ pǝ́ ywǝ́ yǝ â buŋ wɔ́kpǝ áá.  shǝ́ŋ gaǝ̂ bâwaǝ̌lǝ́ nǝ́ pǝ cǝ́ŋ nǝ́ kuŋ mo yǝ ě bǝ́ŋ é á, nǝ̂ nwǝ pǝpúŋ, nǝ́ nǝ́ kwǝ̂. Krǐsto la tǝ cǝ́ŋ â ywǝ́ yǝ a lǝ̂ gɔ puŋ é á pǝ́, dǝ́ŋdǝŋ pâ' bǝ pú lě bvǝ gaǝ̂ : ''Mcáp pǝcap ó lě ŋkó nǝ́ m̀ ''. 

 bǝ́ fa' bí pə fǝládê tyǝ̌'pfô ɔ, nə́ tɔ̂k pɔ pyə wâp bikyǝ á gaǝ́, pǝ́ mo kwâ yǝ mú mo kwâ yǝ lǝ kwǝ́ gùŋ. 

Mfǝ̌mfǝ́, ghɔmsî bǝ́ ywǝ̂ ntʉɔ̀, bǝ ǎ wim gʉ́', bíŋ bǝ́ shɔ́k tǝ shyǝ́ nyǝ̂shu mcɔ̌k bʉǝ́ǝ́; â gɔ tǝ ŋkǝ́m ju'tǝ ghɛnyǝ pû zhwènyǝ̀, tsʉ' ju'tǝ mkwě pú a mhǝ̌m; ê diŋtǝ mnwǝ ntûŋ ba mkwɛnyǝ tʉ́m. Pǝ̂ sɔmywǝ́ lǝ tʉ́mnyǝ́ dzǝ̌ é; bǝkǝ́lǝ̂ bǝ́ dzǝ̌ é bǝ́ â soso e, e nǝ́ŋ bǝ́ jɔ́ awɛ́; pǝ̂ gɔ lá' síŋ é guŋ mghiŋ mɔ́kpǝ̀. 

« Ywǝ́ yǝ á cyǝ Sí á tǝ̌wǝ́ pǝ́»

Á hwítǝ pǝ́ m wɔ́ nǝ́ yǝŋ sásǝdê shyǝ̂ŋkǔ'! 

Pǝ̌ zhyǝ́ gaǝ́ pɔmnǝ̂ŋ bǝ́ ŋkúŋ Sí, kwa' yʉ́ cǝ́ŋ á gaǝ́ wáp yú'pǝpúŋ, nǝ́pâ' a lǝ̂ du á nǝ̂ ŋkuŋnyǝ e tǝ́ pú ké wáp. Pɔ pyǝ e lǝ lǝŋdzǝ jyǝ́ wáp á, e lě dǝ wáp gǝ́ múhwǝ̂ Mû e, jyǝ́ á Mú yǝŋ gɔ pǝ́ shyǝdzǝ vǝŋ mfǝ̂ pyǝ́. Pɔ pyǝ e lǝ ghǝ wáp hwǝ́ é pô' á, e lě biŋ ŋké wáp ; pɔ pyǝ e lǝ kě á, e lě dǝ wáp gǝ́ pɔ dǝ́ŋdǝŋ ; pɔ pyǝ e lǝ lɔ̌nyǝ́ wáp á, e lě há ghámtǝ e bí pú.

« Mo pǝ̂ m wu o pǝ́ m yʉ́ »

Pə ló gaə̂ Cyǝpɔ ywɔ́k bɔ́mtǝ́ wɔ́kpǝ nǝ́ yǝŋ sɛnyǝ́ cúsǝdê sɛ̂sǔ.

 shǝ́ŋ gaǝ̂ guŋ yɔ awɛ́ pǝ́ cǝcǝ̌ po, dǝ́ â lǝnǝsí nǝ́ gǝ yɔ dzǝ̂fà'. Pǒ zhyǝ́ gaǝ̂ Sî ŋkyak pǝŋá'nǝ́, nǝ́ŋ bǝ́ há fʉ' é bí pǝlǝnǝ́sí. Lǝ́ po fí' nǝ̂ yɔ há sí bvʉ' fapû Sǐ, jyǝ́ á e pʉ́' wɔ́ cya thǝ́ cwǝyǝ ě kuŋ áá. Po núŋ guŋ mnwǝ nǝ́ bû myǝ́, nǝ́pá' ê bɔ́mtǝ́ wɔ́ áá. 

Pǝ fí' nǝ́ há sí nǝ́ yǝŋ wénésǝdê gɔ̂sʉɔ̌, bɔ́m ka'nǝ́ ! 

« Mo pǝ̂ ŋká' nǝ̂ e, bǝ pû gɔ fí' í há sí, jwí nǝ̂ e sí, bǝ pû gɔ pʉ́' é tʉ́ mǝ́kǝ́kʉɔ́. 

Nǝfo Sǐ tǝ̂ bǝ́ nwǝ ywǝ́tsʉ́, kǝ mlu' lǝ̂; â bǝ́ nwǝ dǝ́ŋdǝŋ, hwítǝ ba ŋwɛ́nyǝ ntʉ́m Zhwenyǝ Dɔ̂lɔ̌. Mo yǝ ê fa' bî Krǐsto ntî pá' â buŋ mnyǝ̂ Sǐ, pɔmnǝŋ pîŋ ŋkúŋ é. Pô'lǝ́, pǝ tǝ́ŋnyǝ́ pǝ́ ywǝ́ yǝ â dǝ hwítǝ sɔ́' á, ba yǝ â gǝ monǝŋ cɔ́mdzǝ́nyǝ́ lǝ. 

Pǝ ywɔ́k tɔ́sǝdê dzǝ̂mtɔ̂ ɔ, ntǝ́ŋnyǝ́ á ywǝ́ yǝ pǝ́ a tâmtǝ monǝŋ áá.
« Ŋkwishwǝ̂ bí do bí gɔ́m». 

 Â bə́ ntʉ́m Yésó Krǐsto cwəlɔ, bə a lě shyə m nə́ mcyə Krǐsto, wɔ́ pyə po lə̂ bə́ tə gʉɔ səsʉɔ á pîŋ sɔ́' tə bə́ á bə́ŋ é. Yʉ́ Krǐsto nê bə̂ yɔkpə hwítə̀ : e lě də Israɛ̂l pú a pətǝpǝ̌ wáp nə́ gə â ŋkwì pɔ̀; bíŋ shyə m nə̂ bə̌ŋnə̂ é yə pú lə kwetə á, nə̂ pfʉɔ ŋkɛpé bo yə a lə̂ já'nyə́ wáp á, bí mco' Mósɛ̂ pú a bʉɔ̌ ghiŋ nə́. E lə̂ shə́ŋ pô' nə́ lə hwítə shú'tə́ guŋ pɔ awɛ́ nə́ gə pə̂ ta' Mo sə́. E lə̂ bə́wə́ shə́ŋ nə́ tamtə mə́khi pú mə́sɔ́k nə́ gə â ta' bə̌ŋnə́, pú a Sǐ cyə̂ m nə̂ bɛnyəpɛnyə gwó' bvə́nyə́ : â pə́ pô'ó, ê pí bò.

Buŋbuŋ gap fǝládê ntâmgǒ bí po ! 

Á Sî pfʉɔŋkəŋ, yǝ e lǝ cyǝ m nǝ̂ mcyǝ Kɔ sǝ̂ mama jám byâpdzǝ́ nǝ̂ vʉ̌, lwɔdzǝ Byâpdzǝ́, Cyǝpɔ yɔkpǝ Yésô á, â Sǐ bɔ́ɔ ghǝ́ pǝ kú'nyǝ́ nǝ́ ghǝ ywǝ́ yǝ ǎ puŋ nǝ́ nǝ fá' pá' ê ŋkuŋ áá. Ê ghǝ́ ywǝ́ yǝ ǎ puŋ mnyǝ́ é á nǝ́ pǝ, shyǝ́ m nǝ̂ Yěso Krǐsto, yǝ ghámtǝ̂ bǝ́ bí í nǝ̂ gu' nǝ gu' áá. Amɛ̂n.

Á Sî byǎnyə́ pák wɔ́kpǝ nə̂ guŋ tsə̂ cwə̀pùŋ !
Buŋbuŋ sásǝdê tyǝ̌'pfô bí po lǝ́ o !

Mfǝ̌mfǝ́, po kǝ̂ piŋ gɔ́m cwǝpuŋ nǝ́ wɔ́wɔ́; mô ŋkó'nwə nǝ́ fǝ̂ e kə ntʉ́ é á thǝ́kám lǝ̂, a pǝ́ nǝ́ ghɔm cwǝpuŋ nǝ̂ Mco' bíŋ sá' mco'. O nǝ̂ŋ bǝ́ sá' mco', bǝ o tǝ̂ gɔ ghiŋ nǝ́ pǝ́, bǝ ô bǝ́ nǝ́ bǝ́ â fyǝ̀'... Tǝ ô dǝ nǝ̂ o gǝ́ waǝ́, tǝ bǝ́ sá' fǝ̂ ò ?

Tó' fǝ́ yǝŋ gap mɔ́de dzǝ̂dzǝ, bɔ́m nǝ́ piŋ símnɛ nə́ mfǝ̂ pǔ !

( Yésô) Yɔ́ pâ' shyə tə̂ gə̂ o yɔ́ á á yə̌ŋ : â bə n dě də ó gə́ gɛfa' ba ŋkwîŋtɛ̌ ntʉ́m jʉm yə o shyə m nə́ jɔ́ á, ba nə́ myə mjʉm myə m gɔ piŋ nə phə́ nə̂ a bû lə. Gaə̌ tsə̂ tě ó msǔŋ pɔmnəŋ pú a mtə̌mguŋ pətəzhyə̌sí myə gaə̌ wə́ ntə́m ó nə́ á, ô kó gyə́' mnyə̂ máp, fɛ́ wáp nə̂ jʉ̌m shyá nə̂ ŋkà', nté wáp ntʉ́m nəfo Sáta də́ wáp gɔ́ m bə̂ŋ Sǐ pú wá' mhɔ máp, â píŋ shyə m nə́ nə́pîŋ bə̂m, á wáp kwî máp nə̂ mcʉ̌' pá' pɔ dɔ̂lɔ̌ áá. 

Gaə̂ Cyəpɔ ywɔ́k nǝ́ yǝŋ wénésǝdê sɛ̂sǔ, nté wɔ́kpə nǝ̂ mfa' dzʉ̂jʉ̌m, də́ wɔ́kpǝ gə́ â pǒ dɔ̂dzʉ̌. 
Sǐ tâmdzǝ o píŋ bí í ! 

A lǝ pǝ̌ cwǝbɔ́ɔ, Yésô ghɔ̂m bî du monǝŋ gaǝ̂ : «Pú pê' sú mɔ́k nǝ̂ lǎm, nǝ́ sɔ' ntʉ́ m ntʉ̌m cǝŋ kǝ m kǝ̂sǐkóó ? Pú tǝ̂ nǝ sɔ́' ntʉ́ m dǝm kwo'lám á lǝ́ ? Nǝ̂kǝ́lǝ́, sɔmywǝ́ yǝ pú tʉm tǝ pú lǝ ghɔ́ lá' yɔ́ á tǝ̌wǝ́ pǝ́; sɔmywǝ́ yǝ á tʉmnyǝ tǝ pú lǝpǝ́ gɔ́ lá' zhyǝ́ á tǝ̌wǝ́ pǝ́. A pǝ̂ bǝ mǒ ghǝ mtǝ̂ŋ nǝjú' e yú' ! » E lǝ pǐŋ gɔm bí pú gaǝ̂ : «Po cǝ̂ŋtǝ́ bɔ́m ywǝ́ yǝ pô jú' áá ! Fo' yǝ pô gwim á, â dǝ́ŋdǝŋ yá tǝ́ pû gɔ sɔ' nǝ fo' yɔ́, tǝ nǝ̂ hǎ piŋ tám ywǝ́ nǝ́. Nǝ́pá' mo é wim á, pû gɔ sɔ' há ywǝ́ bí í, mo yǝ e ka ghǝ́ ywǝ́ á, pú kwî ba yǝ mûdǝŋ yǝ a kǝ̂ bǝ é ghǝ áá.» 

Nǝ́ yǝŋ tɔ́sǝdê gɔ̂sʉɔ̌, mo pɔ́m "pú gaə́" ! O tʉm cwanwǝ pǝ́ tǝ bǝ̂mdyǝ̌sí, bǝ â gɔ lá' sá' tǝ̌ pú nǝ́ gɔ shyǝ. 

«Mo lâʼ dǝ́ lúŋ nú' kǝkuŋ hyá, bǝ pû gɔ kwí pfaǝ́, nǝ́ŋ tʉ' mjwǐ.»

Gaǝ́ Sǐ lǝ́ guŋ pɔ pyǝ wáp mǝ̂jyǝ lǎ' tyǝ́' ɔ á, nǝ gíŋ tǝ ŋkó ! 

Mfǝ̌mfǝ́, â bé á ntîntǐ mnwǝ pǝ̂ nú' wɔ́, po yɔ́ yá kwa' pá' ŋwɛ́nyǝ gwyǝ́. Nǝ̂kǝ́lǝ́, mlǝŋtǝ myǝ â fo' dǝŋ píŋtʉ̂m yɔ â dǝ sɔktʉ́m sɔ́' nǝ́ po, kyǝ́ptʉ́m yǝŋ pîŋ bǝ́ dǝ́ wɔ́ ŋkó nǝ̂ mfa' dɔ̂lɔ̌; â pǝ́ pô'ó, po cə̂ŋtə́ bə́ tǝbya, tǝ bé â sɔmywǝ́ lǝ yák wɔ́.

 Cyəpɔ tǝ́mtə́ wɔ́kpə, tǝ̂ sɔm ywǝ̂ pəpúŋ kə̂ yǎk wɔ́kpǝ nə́ yəŋ fǝládê dzǝ̂mtɔ̌. 

«Mô jɔ́gó' tǝ́ dí bǝ́ mò. Gwô' tǝ̀ bǝ̀ŋ, gwǒ' jú.»

Ywǝ́ yǝ gaǝ̌ zhyǝ́ tǝ ywɔ̌k bú'nǝ́ á, gaǝ̂ gaptǝ yá tǝ tʉm sɔmywǝ́, tǝ lwɔ' bínyǝ̂ myǝ́. Nǝ̂kǝ́lǝ́, zhyǝ̌nwǝ̂ bǝ́ dzǝ̌ monǝŋ shwǝ́ pâ' ta' tɔ̌kcyǝ tǝ pə̌ símnyǝ́ lǝ. Pɔ pyǝ wâp jyǝ́ nǝ́ wim yá á lě biŋ jí msó Sí. Pǝ̂ nǝ́ŋ bǝ́ á tuŋpú é : tə ŋkə́m á nə̂ bǝ̌ŋnǝ̂ yɔ́kpǝ̀, guŋ zhyǝ̌nwǝ yɔ́kpǝ ba pǔvə yɔ́kpǝ̀.

« Ywǝ́tsʉ̂ jɔ́ nwǝ síŋ mò». 

Cɔ́m mtso mɔ́k m Cyǝpɔ Sî. 

Wu yǝ ô bǝ̂ yɔ́k Ŋka' á, ghǝ̌ Dyǝ̂sî o kyǝ́'nyǝ́, _ â lá'tǝ́ ghámtǝ o bí lâ'lǎ'. 

Pɔ́mtǝ́ mpyápdzǝ̂ tsǔ, pǝ mkǎmsîkwɛ́, mkǎmsî ba pǒmkámsí : _ â mghǝnwǝ máp pǝ́mtǝ́ pú a ghɔm tsyǝ wâp shyanyǝ áá. 

O lě dǝ bɛnyǝpɛnyǝ o há hwítǝ bî dǝmcǎ' : _ ghǝ̌ pyǝ fá' nǝshǝ́ŋ cɔ̂mdzǝ́nyǝ́ cǝcǝ̂ gùŋgùŋ. 

Ghǝ́ puŋtʉ́m nǝ̂ mkwǐshyǝ pyǝ wáp lɔ́mdyǝ́ á, _ á wáp pǝ́ mkwíntɛ́ nǝ̂ kɔ tsǔ tǝ yǎ' tyǝ́'. 

Buŋbuŋ gap mɔ́de shyǝ̂ŋkǔ' bí po lǝ́ o ! 

Mo pɔ́m nǝ́ fîŋ mǝ̂jyǝ gíŋ ghɛ́ ! 

Cyəpɔ̂ bə́ bə̂ŋ guŋ pɔ pyə wâp də tʉ̂m tə mfʉm ntéŋ é.

Kə̂ ghə kukuntúŋ nə́ fǝ̂ o yə ê dǝ pyányǝ shwə́ bə́ŋ o (tə pə̌ ŋkwóptǝ́ ó).

Cyǝpɔ̂ ma' do dyǝ́ mòcwǝ̀pùŋ, da'gaǝ́ bǝ́ hwím tsʉ'shwǝ́ pɔ dǝ́ŋdǝŋ. 

 Cyǝpɔ hwím wɔ́kpǝ cúsǝdê dzǝ̂dzǝ ɔ, nté ma cʉŋkhîŋ ba sǝ̂tʉ̌m vǎm pǝ̀ ! 

Po kǝ̂ ghǝ̂ Zhwenyǝ Sí yǝ e lǝ vo mtiŋ myǝ́ nǝ́ pó, tǝ́ nǝ́ byáp tyǝ́' vɔk yɔ́ á lá'á. Po cǝ̂ŋtǝ́ ntɔ́m puŋtʉ̂m ba pyányǝ cǝcǝ̌ po. Kwa' wɔ́wɔ́ pǝ́ gwá' mhɔ cǝcǝ̌ po, dǝ́ŋdǝŋ pâ' Sǐ lǝ cyǝ m nǝ̂ Krǐsto gwá' mhɔ mɔ́ áá.

Pǝ ywɔ́k wénésǝdê ntâmdzǝ ɔ, shə̂ŋtə́ gwá' mhɔ mfǝ̂ pɔ́kpǝ, dǝ́ŋdəŋ pâ' Sî gǝ yǝ́ nǝ́ pǝ áá !

 shǝ́ŋ gaǝ̂ guŋ pɔ awɛ́ pǝ́ dǝ́ kwà' ŋkwìshwǝ̀, cɔ̂mdzǝ́nyǝ́, ŋkuŋnyǝ mfǝ̌mfǝ̂ ba pyányǝ nǝ́ shwǝ́, tǝ kukuntúŋ. Po kǝ̂ lǝ mhɔ bá' mhɔ, kǝ dǝ́ â mcap bá' mcap lǝ̂. Da'gaǝ́ po pǝ́ níŋ â bwǎnyǝ́ nǝ́ pyǝshǝ́ pɔ, nǝ́pâ' tsɔ́ fâ' bǝ́ nǝ́ kwî mcʉ̌' bwányǝ́ Sí áá. 

Nǝ́ yǝŋ tɔ́sǝdê sɛ̂sǔ, pǝ ywɔ́k dǝ́ â ŋkuŋnyǝ nǝ́ shwǝ́, tǝ tsǝbò, tǝ vamtǝ̀, tǝ kukuntúŋ. 
Dʉ̂m jú' â ghɔmtǝ tǝ́ ŋkó dyǝ́. 

Mfǝ̌mfǝ́, â ŋkuŋnyǝ mfǝ̌mfǝ́ kǝ̂ lǎ' ják ! Ka po tʉɔ̂nyǝ nǝ́ lǝ gʉɔ pǝpúŋ : a lǝ ghǝ̂ shǝ́pɔ nîŋ mcǒ'sí dyǝ́ tǝpǝ̌wǝ́ jyǝ́. Po kámtǝ́ pɔ pyǝ wáp dyǝ̂cɛ̌ á, m ntîpá' poapú é bǝ́m bǝ́ mghɛcɛ́ áá. Po kámtǝ́ pɔ pyǝ pû dǝ wáp jɔ́gó' á nǝ̂kǝ́lǝ́, ba wɔ̂ yɔ́ wim bǝ́ŋnǝ́. Â guŋ pɔ awɛ́ níŋmku' nǝ̂ lɔ̌mdyǝ́, bɔ́m nǝ́ lǝ mcak shí' ntamtǝ lɔ̌mdyǝ́ nǝ̂kǝ́lǝ́, Sî gɔ sɔ' cwó'tǝ́ mcʉ' pú a pǝghǝghàp. Â yɔ nǝ́ sɛ̂nwǝ kǝ̂ kǝm á nǝ̂ ŋkapǝ́ : po ŋwɛ́nyǝ́ nǝ́ yǝ mûdǝŋ yǝ pǒ wim á nǝ̂kǝ́lǝ́, kwa' yʉ́ Sî gɔm gaǝ̂ : «Ŋ ka lá' nté bú nǝ́ ò, pǝ̂ n dǝ lá' gwá' ó». 

Buŋbuŋ fǝládê gɔ̂sʉɔ̌ bí po lǝ́ o !
Mo pû ŋkǎp tǝ̂ gɔm pǝ́.

Yɔ́ gʉ̂' pâ' fʉ' ba zhyǝ̌nwǝ Sî bǝ́ tə̀ fò' ! Pǝ́ mo lǝ zhyə̂ yǝ ntî nǝ́fyǝ̀'; waǝ̌ ghə nə́ cyə nǝ̂ mjyǝ myə́ǝ́ ? Waǝ̌ lǝ̌ zhyǝ́ ntúŋ Sí ? Â waǝ̌ yǝ e lǝ̌ tɔ́k é â ? Waǝ̌ lǝ̌ lǝŋdzǝ há bí í tǝ́ bǝ́ byáp gaǝ́ ê tí bâ' ? Nǝ́kǝ́lǝ́ bâkǝ́lǝ̂ fǝ́ á bí í, nǝ́ŋ bǝ́ shyǝ́ â m nǝ́ é, nǝ́ŋ bǝ́ â yǝ́. Á ghámtǝ mama pǝ́ bí í ! Ǎ pó'o.

 waə̌ pâ' Sǐ â ? Tǝ thǝ́ Sí â thǝ́ waǝ́ lɔ́ɔ́ ? 
Pǝ há pá'lǝ́ bî Cyǝpɔ pá' e dí jám wɔ́kpǝ nǝ́ yǝŋ sásǝdê dzǝ̂mtɔ̌ ! 

Sî pyányə ba cɔ́mmtsò, cɔ́m mtso mə̌.

Cyəpɔ̂, yú' gi a shɔ́m mtso mə̌, nə̂kə́lə́, gaə̂ bə́ bə́ŋ, bə́ gɛ̀ghə̀ghʉɔ̀. 

La'tə á mə̂jyə o m Cyə̀pɔ̀, jyǝ́ â gaǝ ghiŋ ntʉ̂m yu də́ŋdəŋ; cú'tǝ́ tʉ̂m tsaǝ̌, áá pə́ bwɔ́k tsô tsǔ. 

Cyəpɔ Sî à, gaə̌ gho'tə ó nə̂ guŋ tʉ̂m tsaə̌, gaə̂ gɔ lá' pə́ ghámtə́ tsô tsǔ; â bə ŋkuŋnyə ó ghá'bú nə́ m̀; o lě fəŋ á nté á msûŋ vʉ̌.

Ma' mnyə́ nə́ m shɔ́m mtso mə̌. Há gʉ̂' o bî gɛfa' o, bíŋ bvɔk mû mǝ̂gɛ̀fà' ò.

Lǝmnyǝ́ gap mɔ́de tyǝ̌'pfô bí po lǝ́ o !

Mo lâ' bǝ́ m wu o pǝ́ m yʉ́! 

Gɛvɔk yɔk bǝ́ Sî yɔ̀k ! 

Ghǝ̌ pyǝ lwɔ́' mco' mǔ nǝ́ yǝŋ tyǝ̌'dzʉ́,  _ fó' ó, gǝ́ â ywǝ́ yǝ â buŋ Tá. 

Gaǝ́ pyǝ níŋ bwányǝ́ nǝ́ o tyǝ́' ɔ pǝ́ tǝ yâ' : _ â mghɔm mɔ̂k ba mfa' mɔ́k pǝ́ ywǝ̂ nǝsé ó nyǝ́nyɔ́. 

Ghɔ́ gǝ́ pyǝ kǝ̂ nyaknyǝ sɔmmo
tyǝ́' ɔ; _ pɔ pyǝ wáp kǝ́ká wɔ́k á, pyǝ lǝ́ ŋwɛ́nyǝ dǝ́ wáp. 

 Cyǝpɔ ywɔ́k cúsǝdê shyǝ̂ŋkû' bɔ́mtǝ́ wɔ́kpǝ̀ ! 

A pô' tǝ̂ Yěsô lə ghɔ̌m bí pə̂ŋkʉ̂ pyə́ gaə̂ : "Jyə́ â ba wɔ̂ ŋkwi' bə́ á pə təghəthə́ lə́ ? Jyə́ á tʉɔ bí po nə́ yû' gaə̂ sɔmywə́ yə â fə́ m dzʉ̌ tə́ ŋkó nə́ mo á ka ghə́ nə́ viŋ é, nə́pâ' a tə̂ ŋkó ntʉ́m tʉ̂m tsyə́ á, â ŋkó m vǎm é bíŋ sɔ́pnyə́ dzə́ŋ â m kwa. A pə́ pô' tə̂ Yěsô ghɔ̂m gaə́ â bə guŋ tsə́tsʉ́ pùŋ. 
E lə pǐŋ gɔm gaə̂ : "Ywə́ yə â ntə́m nə́ mo á nê bviŋ é nə̂kə́lə́, mkwɛnyə mcâk ntə́m á vǎm mò : mghìŋ cwə̀pùŋ, cǔŋ, nə́ zhwə̂ mò, ghàp, nə́ kuŋ ŋkáp, sə̂tʉ̌m, mfʉm, nwə cʉ̀', ghò'nyə̀, kǒ'nwə̀, ka'nə́ pú à də̀ŋtə̀kù'. Guŋ mnwə cwəpuŋ mɔ nê bviŋ mò, nə́ŋ bə́ ntə́m á vǎm é.

Buŋbuŋ wénésǝdê dzə̂dzə, tyə̌' sim gwyə́ Jo bí po ! 

Kǝ̂ tǎk kwǝ nɔm dzǝ̂ yǝ́ bvʉ́! 

Cyǝpɔ Sǐ wǝ́ gɔ́m gaǝ̂: Kɛbǝ̂ŋ bǝ́ kwo' nǝfo tsaǝ̌, dǝmcǎ' nǝ́ŋ bǝ́ ntʉ̂mkwǝ̀ à. Tǝ pô gɔ kwǝ́ pa' bǝ̂m tsʉ'kǝ ? Tǝ yaǝ tsʉ' hwítǝ̂ gɔ pǝ́ m hǝ́ ? Tsǝ̂ bâ bǝ́ â mfa' nthǝ́bû mǝ̌, yá awɛ́ pǝ́ â yaǝ̌. Ghɔm Cyǝpɔ Sǐ. Mo yǝ gaǝ̂ ntʉ́ mnyǝ́ nǝ́ é á, â bǝ́ ŋkə̀mnyə̀, mo yaǝ́ yǝ tʉ̂m tsyǝ̂ bwátǝ́, e pǝ́ jú' ghɔm tsaǝ̌ bwɔ́k.

Pə kámtə́ gaə́ yǝ̂ŋ bǝ́ tɔ́sǝdê ntâmdzǝ.

Jwǝjwǝ pwɔ̂k sɛ̂ bǝ e kwyǝ́. 

Pə̂ mcə myə â dzə́ŋ á lə pí mɔ́k ŋkùŋnyə̀; pə̂ fashyə lə lá' ŋkwâ. Mo khʉ̂m dyə̂ e â wɛ́ há gaə́ e nə jó ŋkuŋnyə, bə yə́ pê gɔ pə́ da'gaə́ pú kwí bíŋ ntám â kúsô gwyə́ thə́ é. 

Pú tǝ̂ gǝm Sí tǝ́ níŋ cwyǝ̀p pǝ̀. 

Po ywɔ́k pǝpúŋ nǝ́ yǝŋ fǝládê sɛ̂sǔ! 

Mfə̌mfə́, po káktʉɔ nə́ cəŋtə ntɔ́m pâ' Sǐ lə kě wɔ́ bíŋ shí wɔ́ áá. Po ghə pô' bə pə́ po lə kótə̀. Â pə́ pô' jyə nəŋkó ntʉ́m nəfo mama Cyəpɔ ba Gɛvɔk yɔkpə Yéso Krǐsto, hé bí pə á tə pə jwók bú' nə́.

Mo lâ' bǝ́ m wu o pǝ́ m yʉ́

Buŋbuŋ sásədê gɔ̂sʉɔ̌ bí ŋkɛ̂mò !

Gûŋ bǝ́ m jʉ̀m

Gɛvɔk dəmca', ghə̌ monəŋ cʉɔ́tə́ â m bǝ̌ŋ ò.

Cyəpɔ̂, yu gʉ̂' bə́ ŋkùŋnyə̀; â bə pyə̌ pwá : sɔ' ŋkwítə́ wɔ́k.
Lé Dyə̂sî o yə â bə á sa dəmcǎ' : áá cyányə́ Buŋŋkʉɔ tə gɔ́ ŋkəm tǝ ŋɔ̂nəpɛ.
O tə̂ bə́ gʉɔ səsʉɔ nə̂ sɔmmo nə́ pyə pə́; _ ghə̌ pɔ pyə wâp mǝmtǝ ó ntʉ́m jʉ́m á có' pú nə́ ò.
O lə yɛ̌ mo bə fʉ lə tǎm é fə́ vàm; _ ghɔ́ shɔ́m wɔ́k nə̂ mko'tə mɔ́k.
Lə mfə̂ pɔ́k pyə wáp támdzə á ntʉ́m Tísuŋ dɔ̂lɔ̌, tsʉ' yə Sî gɔ sɔ' pə́ guŋ mnwə awɛ́ bî guŋ pɔ awɛ́.

Buŋbuŋ gap mɔ́de ntâmgǒ bí po lǝ́ o ! 

Mo tsʉ̂ ŋka' â dǝŋ gaǝ̂kǝ́lǝ́, tǝ́ bǝ́ gɔ sɔ' pí ghɛnyǝ é, bǝ a kwítǝ́ é m kǝ ! 

Kǝ̂ pwɔ̌k mo yǝ ê shú'tǝ́ tsǝ́ ŋkà', bǝ́ jwɔ́k dǝ́ tsǝ́ mtʉɔdǝŋ ŋkwíŋ dyǝ̂ e : e tǝ́ nǝ̂ tsǝ̂ŋ mɔ̂kgwyǝ́ dǝ́ sɔmywǝ́ pǝ́; ghámtǝ e lǝ nǝ́ŋ bǝ́ dzǝ́ŋ shyá é. 
E kǝ̂ bǝ́ sîcǎ' bǝ́ sú co' dǝ́ nthǝ̂pû e dá'tǝ́ : «Pû ntogǝŋ thǝ́ o nǝ́pá' ô jɔ́ gaǝ́ ǒ kù' ! » Da'gaǝ́ o pǝ́ dzǝ́ŋ pâ' m nǝ́ kwyátǝ ŋkhǝnyǝ mtâ pǔ pyǝ, wáp ka lá' bíŋ jɔ́ dɔ̂dzʉ̌. 
Mo zhî á gaǝ̂kǝ́lǝ́, tǝ́ bǝ́ tǝghǝthǝ́, bǝ ê gɔ cʉ á pâ' kɔm mnɔm pyǝ pú nǝ gɔ́ m nǝ́ watǝ áá.

Mo kɔ̂p ŋka' â dǝŋ gaǝ̂kǝ́lǝ́, tǝ́ tǝpǝ̌ hé mfǝ́ pyǝ́, bǝ ê bǝ́ á kwa' bû'cutǝ̌m. 

Nǝ̂ ywɔ̌k cúsǝdê tyǝ̌'pfô ɔ, bɔ́m nǝ́ ghǝnwǝ pâ' tǝghǝthǝ́.

A lə pə̌ pô' Yěsô ké pə̂ŋkʉ̂ pyə́ gɔ́m bí pú gaə̂ : «Pǒ zhyə́ gaə́ pəsá' gûŋ də â tʉɔ yáp nə́ sá' mgùŋ, pɔ gwyə́gwyə́ pə́ da'tə gʉ̂' yap. A tə̂ gɔ pə́ pô' cəcə̌ po pə́ : mo yə ě wə́ shə́ŋ nə́ pə̂ yəgwyə́ cəcə̌ po â gɔ pə́ gɛfa' yɔ; bé á mo pə̂ shə́ŋ nə́ pə̂ dəŋdzə cəcə̌ po, e pə̂ ŋkwɔ yɔ. A pô' tə́ Mú mo la tə̂ sɔ' m dəmcǎ' gaə́ pú fá' bí í pə́, e lə̂ sɔ' m nə́ fa', piŋ há vɔk é nə yó thə́ pɔ tə jɔ́m.»

Pyányə̌ nyaptə shyə́ gʉ́'. 
Po ywɔ́k pəpúŋ nə́ yəŋ wénɛ́sǝdê ntâmgǒ.

A lə pə̌ cwəbɔ́ɔ Yěsô pə́ gɔm bí pə̂ŋkʉ̂ pyə́ gaə̂ : «Po lô bə pû gɔ há bí po; po cə̂ŋ bə pô gɔ yɔ́, ŋkó'tə̂ bə pû gɔ hé bí po. Nǝ̂kǝ́lǝ́, mo lô bǝ pû gɔ há bí í; mo cǝ̂ŋ bǝ ê gɔ yɔ́, ŋkó'tǝ́ jyǝ bǝ pû gɔ hé... 
Pô'lə́, bâkə́lə́ yə pô shǝ́ŋ gaə́ pyəshə́ pɔ ghə́ nə́ po á, ba wɔ̂ yɔ́, po ghə́ pô' nə́ pú : a pâ' Mco' pú a mghǎmdô' gɔm áá.»

Buŋbuŋ tɔ́sǝdê tyǝ̌'pfô bí po lǝ́ o !
 
Mo tǝ̂ a bǝ́ dóló gɔ́m gaǝ́ pú ló'nyǝ́ gǝ́ ê ghɔ́ pǝ́. 

Cyəpɔ Sǐ ghɔm gaə̂ : Mo cwəpuŋ ma' mka' nə̂ guŋ cwəpuŋ yə e kə̂ gə á, dwɔ' guŋ mco' mə̌ gíŋ nə̂ də́ŋdəŋ ba nyə́nyɔ́, bə ê gɔ vɔk; bə e tə̂ gɔ pfʉ́ pə́. Pú tə̂ gɔ piŋ kámtə́ sɔm nə́ bâpbáp mnwə myə́ pə́, bə jyə də́ŋdəŋ yə ě wə́ gíŋ nə́ á há vɔk bí í ...
Tə́ modə́ŋdəŋ tə̂m nə̂ jyə də́ŋdəŋ ŋkó nə̂ cwəpuŋ, fó' mcyəya' myə mocwəpûŋ ntɔ́m á, bə pə́ mo lə píŋ ŋkámtə́ də́ŋdəŋ yə e kə̂ giŋ nə́.

Mo pə̂ gə́ pəpúŋ, e kə̂ le jʉ̀m, e kə̂ těŋ tə́ŋ.

Po ywɔ́k pǝpúŋ nǝ́ yǝŋ fǝládê shyǝ̂ŋkǔ' !

A lə pə̌ cwəbɔ́ɔ, Yěsô ghɔ̂m bí pə̂ŋkʉ̂ pyə́ gaə̂ : Po lə yû' bə pú ghɔm gaə̂ : "Ô gɔ pə́ kuŋ fə̂ o nə́ŋ pɔ gɛ̀bò ò". Mpá' myə á, gaə̌ ghɔm bí po gaə́ : po kúŋ mghɛbo pɔ́ nə́ŋ shwyə́'nyə́ Sí nə́ pɔ pyə wâp bɔ wɔ́ á, jyə́ á po pə́ kwa' pǒ Tâ yɔ́ yə ê bə́ kɛbəŋ á nyə́nyɔ́ nə̂kə́lə́, ê gə nam e sá' nə́ pɔcwəpuŋ ba nə́ pɔpəpúŋ, gə̂ bəŋ lú nə́ pɔdə́ŋdəŋ ba nə́ pɔmfʉ̀m... Ǎ pô' bé á po pə̂ ŋkúŋ â da' pɔ pyə wâp ŋkuŋ wɔ́ á, bíŋ bə́ shâ'tə́ á mfə̂ pɔ̂ bə pǒ fo' kwa' yá ntî dǎmjɔ́ɔ́ ? Ba pətəzhyə̌sí tə̂ gə yáp á pô' áa ?

Mo tsǝbo bǝ o ká waǝ́ ?

 Sǐ támdzə nə́ yəŋ sásədê dzǝ̂dzə, gə́ pǝ ywók gǝ́ â pəpúŋ !

A lə pə̌ cwəbɔ́ɔ, Yěsô pə́ gɔm bí pə̂ŋkʉ̂ pyə́ gaə̂ : "Po pə́ shɔ́mmtso, də́ŋdəŋ pá' Tâ yɔ̂ bə́ gɛcɔ́mmtsò. Po kə̂ cwǒ'tə́ sá', bwɔ́k pá' pú dí shwó'tə́ wɔ̂ yɔ́. Po kə̂ ghə̌ mo vʉ́ sá', pú tí gə́ po vʉ̂ yɔ́. Po wá' mhɔ̌ pú tí gwâ' mɔ́. Po há, pú tí nə̂ hâ yɔ̂ bə pú cáp, hyá, shî'tə́ tə á yâ' fo' tə́ pú vɔ́p pʉə̌ po. Nə̂kə́lə́, pû gɔ sɔ' lə á ywə́ yə pô nə fô' yə́ pyəshə́ pɔ á tə́ nə fo' yɔ́."

Mo pɔ́m nám ! 
Ywǝ́tsʉ̂ jɔ́ nwǝ sɔ́' síŋ mò. 

Pə zhí á pəghap tǝkeŋ pú ntʉ́m yǝŋ gap mɔ́de sɛ̂sǔ!

A lə pə̌ cwəbɔ́ɔ Yěsô ghɔ̂m gaə̂ : "Pə Skrîbə pú a pə Farizyâ shwə́ á dǝm kwo' Mósɛ̂ tə́ jí'tə́ lá'. Pô'lə́, po yú' ywə́ yə â ntə́m shwə̌ pú á, bíŋ gíŋ pá' wâp gɔm áá. Da'gaə́ po pɔ́m nə́ fo' mfa' máp nə̂kə́lə́, wâp gɔm Ghɔmsí te' da'gaə́ wáp lə pə́ ntɔ́m. Wâp nthə́ ŋkəm dzaətsaə ntʉ́ thə́ pɔ̀mnə̀ŋ, tə́ kwa' wáp lə pə́ ŋkúŋ nə́ kwà. Wáp nə̂ ghə bəkə́lə́ bə́ shə́ŋ á gaə́ pú yɔ́ wáp... Wâp ŋkó tsʉ' la'nwə shə́ŋ â kwo' mkù'...
Mo gwyə́ cəcə̌ pô gɔ lə nə̂ e ghə gɛfa' yɔ. Mo ŋâ' nə̂ e, bə pû gɔ fí' í; nə́ŋ də́ nə̂ e sí, bə pû gɔ pʉ́' é.

Pə yú' ntɔ́k, gíŋ nə́, bvɔ̂k shǝ́ mnwǝ nǝ́ yǝŋ cúsədê gɔ̂sʉɔ̌ !

Po lǝ́ nǝ́ pwɔ̂k ba nǝ́ cǝŋtǝ há mku', shǝ́ŋ ywǝ́vɔk yɔ́ tǝ sǝ́ŋ, tǝ́ da' cwǝyǝ gaǝ̌ sí á pǝ́, gɔ́m te' gɔ́m cwǝyǝ n tǝ yaǝ̌ sí áá. Nǝ̂kǝ́lǝ́, yǝ nǝ́kuŋ Sǐ nê gǝ tǝ́ po pǝ́ níŋ thǝ́ nǝ̂ fa', dúpá' ê bap â pǝpúŋ nǝ́ po áá. Po pǝ́ fâ' bǝkǝ́lǝ́ pǝ́ tǝ vamtǝ̀, tǝ tɛshwǝ̀; â cyǝ́ m pô'ó po pǝ́ tǝbya bíŋ bǝ́ dɔ̂lɔ̌, wɔ́ pǝ́ e pô bǝ́ pó Sî tǝ pǎp mviŋ, ntʉ́m ta' sɔknyǝ́ wɔ́dzʉ̂ cwǝpuŋ, ŋkyǝ́' pâ' msɛ ntʉ́m dzʉ́.

Mo lǝ lúŋ nú' kǝluŋ hyá, bǝ pû gɔ kwí pfaǝ́, nǝ́ŋ tʉ' mjwǐ. 

Yǝ̂ŋ bǝ́ wénésǝdê dzǝ̂mtɔ̌ !  

Cyəpɔ Sǐ ghɔm gaə̂ : «Buŋtsê bə́ mo yə ê há ka'tə é bî Cyə̀pɔ̀, mo yə Cyəpɔ bə̂ yə̀ mɔ̀ktə̀. Ê gɔ sɔ' cwə́ pâ' ta'thə̂ bə pú pá kə́ŋshyə, a pə́ siŋ mŋɛ myə́ shyə : a lə pə́ bwɔ́k cwəyə nǎm wə́ sɔ́' á, mhwə myə́ pə́ shwə́ â mimnyəmimnyə. A pə́ kapləm e lə cɔ́m nə̂kə́lə́, pə́ a lə kɔ́ é nə́ yâm ntɔ̌m. Pǝ̂ sɔm mfʉm lǝ cyǝ́ myǝ â ntǝ́m tʉ́m mò, tsyǝ́ hwǝ tǝ̌wǝ́ pǝ́. Pǝ̂ waǝ̌ zhyǝ́ yá ? Da' myǝ Cyǝpɔ yǝ ê jyǝ́ ghɔm ntúŋ jyǝ̂ tsyǝ́ vʉ́', nǝ́ nǝbá' mghiŋ, ba mfa' bǝwaǝ̌lǝ́ bí í.»

Pə lányə́ nə́ ma' yɔkpə gwa da' bî Cyə̀pɔ̀ ! 
Pyanyǝ́ tɔ́sǝdê ntâmgǒ bí po lǝ́ o !

Yésô Gɛvɔk yɔk, pyǝ̌ sé ó

O lǝ yǔ'nyǝ tǝ bíŋ nǝ́ pfʉ̂, nǝ́ jí'tǝ́ wɔ́k pô' lwɔ̀dzǝ̀ ŋkùŋnyǝ̀.

Ô bíŋ nǝ́ kwa do mnwǝcwǝpuŋ, nǝ́ da'tǝ wɔ́k gʉ̂' puŋtʉ́m Tá.

Ô shwyǝ́'nyǝ́ nǝ́ pɔ pyǝ wáp lǝ kwetǝ ó dǝm bɛnyǝpɛnyǝ á, a lányǝ wɔ́k nǝ́ wâ'mhɔ á tǝ lejʉ̀m.

Ô shwó'jyǝ lǎ'puŋ bî bʉɔtʉ̂m samshwǝ, a há nǝ́ mɔktǝ bí pyǝ.

Ô dunǝ̂vʉ̌ nǝ̂ batǝ tyǝ̌' tá, nǝ́ bʉ́' mpfaǝ́sí pyǝ wáp ntʉ́m hwítǝ̀.

Buŋbuŋ fǝládê tyǝ̌'pfô bí po lǝ́ o !

Bonjour et agréable début de week-end à tous !

Sî Yěso Krǐstò, pǝ̂ yɔk Sí! 

Sî ŋkyǝ̀'nyǝ̀, ví' ŋka' ó mtʉ́m pyǝ, _ jyǝ́ á pyǝ cwyǝ́'nyǝ́ ó pǝ́ nyǝ́nyɔ́ :

Sɔ́k mkɛnyǝ mɔ́k, níŋ gʉ́' nǝ̂ tsǝ́ tsyǝ pyǝ̌ wǝ́ sʉ́m á, _ gǝ̌ pyǝ kǝ̂ pwǎ nǝ́ zhyǝ̂ nǝ́ cwé ntéŋ ó. 

Ghǝ̌ mnyǝ̂ mɔ́k pǝ́ dǝ́ â mpǝ̌ŋ díŋ ó, _ bíŋ gǝ̌ pyǝ a pú pǝ́ bǝ́mtǝ́ ntéŋ ó. 

Ghǝ̌ tsǝ̂ tsǔ ywɔ́k gǝ́ pyǝ ŋwɛ́nyǝ́ nǝ́ yǝŋ tyǝ̌'dzʉ́, _ jyǝ́ á pyǝ zhyǝ́ gʉ̂' ŋkuɲnyǝ o zhwop sé ó gaǝ̂ :

 Cyǝpɔ lǝ́ ŋwɛ́nyǝ sɔ́' bí pǝ, nǝ́ yǝŋ wénésǝdê tyǝ̌'pfô. 

Mfǝ̌mfǝ́, Krǐsto lě mpfʉ́ mla' mhɔnwǝ, ŋkwi cʉ̌m a kû'; yʉ́ mo dǝ́ŋdǝŋ lǝ̂ mpfʉ́ pô' nǝ̂ thǝ́ pɔ pyǝ wáp hɔ á, bǝ́ shǝ́ŋ nǝ́ lǝ wɔ́ gɔ́ dzǝ̂ Sǐ. Pú lǝ zhwǝ̌ é nǝ́ bǝ̌ŋnǝ̂ é; Sǐ pîŋ bá' é ntʉ́m Zhwènyǝ̀. Yʉ́ yǝ e lǝ kwô' m kɛbǝŋ â bǝ ě cyǝ mcó'sí pú a guŋ mgʉ̌' myǝ pú tǝ̂ jɔ́ á, bǝ́ shwǝ́ nǝ̂ ghǝ̌ŋ pûtʉɔ Sî Tá.  

Mo lâ' bǝ́ m wu o pǝ́ m yʉ́ ! 

Buŋbuŋ tɔ́sǝdê shyǝ̂ŋkǔ' bí po lǝ́ o ! 

Gaə̌ kuŋ Cyə̀pɔ̀ : ê jú' mcwyə́'nyə mə̌; ê bɔ́ tə̂ŋ é jú' á : gaə̂ gɔ ghə teŋ é tə lá' pfʉ́.
Cyəpɔ̂ bə́ də́ŋdəŋ, bə́ cɔ́mmtsò; Sî yɔ̂k bə́ pyányə̀: n də pwǎ e sɔ̂' ŋkwítə́ á.
E lě nté ghɛnyə á msûŋ vʉ̌, shí' shyətsə̂ á, gə̂ n də hɔ́ kwə á.
Gaə̂ gɔ pə́ ghiŋ bə̂ŋ Cyəpɔ dəm cǎ' pɔ̀mtʉɔ̀.

Pə pú' bú fǝládê dzǝ̂dzə ɔ, dó gaə̂ Cyəpɔ zhɔ́k shu ntʉ́m guŋ yɔ́kpǝ̀. 

Pú tǝ́ a bǝ́ jɔ́kshu sɛ́ mpfǝ́ pǝ́

Mû Sî màmà, kwítǝ́ wɔ́k ! 

Pyǝ̌ teŋ ó nǝ̂ thǝ́ pɔ pyǝ, gho, vʉ̌ kǝ pǔ' wǝ́ hyá wáp : _ yɛ wáp, zhwyǝ́tǝ́ wáp, té wáp mtʉ̀. 
Pyǝ̌ cwyǝ́'nyǝ́ ó nǝ̂ thǝ́ pɔ pyǝ wáp wá' mjyǝ mǔ : _ ghǝ̌ wáp yɔ́ cɔ́mmtso o, ba ŋwɛ́nyǝ nǝ́ cwǝ̂ ntʉ́m ma sǝ́. 
Nǝ́ wɔ́k mghɛmhɔ̀, wu yǝ o lǎm hɔ́ sɔm cʉ́m á, ghǝ̌ pyǝ yɔ́ ó pâ' fyǝ'shɛ yǝ ê shɔ́mmtso áá. 
Nǝ̂ bǝyá mo lǝ́ sîcǎ', ba nǝ́ pɔ pyǝ wáp támdzǝ á, pyǝ̌ teŋ ó. 

Tǝ thǝ́ Sí á, thǝ́ waǝ́ lɔ́ɔ́ ? 

Buŋbuŋ sásǝdê ntâmdzǝ bí po ! 

Ŋka' kě sá', pú pʉ̂' guŋ pǝlǝnǝ́sí, álelúyà. 

Gaǝ̌ pʉ́' mnyǝ́ dé ó, wu yǝ ô bǝ́ kɛbǝ̀ŋ. 
Kwa'pâ' pu' bǝ́ dé pú táp e, kwa'pâ' mnyǝ́ gopu' bǝ́ dé pú máp e á, mnyǝ̂ mɔ́k pʉ́' bǝ́wǝ́ byáp cɔ́mmtso Cyǝpɔ Sî yɔk yǝ ê bǝ́ kɛbǝ̀ŋ. 
Cɔ́m mtso mɔ́k m Cyǝ̀pɔ̀, cɔ́m mtso mɔ́k ! Ghɛnyǝ yɔ́k wúŋ mcàp. 
Ǎ piŋ gá'bú : pyǝ̌ wúŋ mwi pɔ pyǝ â bǝ wáp kù', jwyǝ́ mkó'suŋ pǝka'nǝ́. 

Mû gwi mâp e lá' lɔ̂m yǝ́.

Pǝ lǝ́ á hwítǝ ntó' yǝŋ gap mɔ́de gɔ̂sʉɔ̌! 

Kámtə́ Dyə̂sî o m Cyǝ̀pɔ̀ !

Tâ, o lə kǔŋ gaə́ Mû u lúnə̂vʉ̌ dá'tə́ nə̂ e bî Mcwiŋkʉɔ̀, _ lə wɔ́k gə́ mkwíntɛ́ lunə́vʉ̂ e.

Wu yə o lə tə̌m Mû u e cyânyə Ŋkʉɔ Pəpúŋ bî mpə̌ŋ á, ghə gaə́ pyə cyányə́ Bùŋŋkʉɔ̀.

Wu yə o lə cya Mû u e tsə̂ ghɔm á, _ cyá mghɛfǎ' wáp káp.

Wu yə o lə cya Mû u e pfyə̂ á kwa' mcyə̂ myə́ nə́ hapmla' mɔ́ po dəmcǎ' á, lə wɔ́k gə́ tsə́ hwítə̀.

wu yǝ o lǝ ghǝ Mû u cwǝ́ ghǝ́ŋ pûtʉɔ ó kɛbǝŋ á, lǝ mpfaǝ́sî pɔ́k ntʉ́m ŋwɛ́nyǝ Nǝfo tsǔ. 

 Sǐ támdzǝ nǝ́ yǝŋ cúsǝdê dzǝ̂mtɔ̌! 

Cyǝpɔ Yésô, sɔ̌' pǝ pǝ́m shwǝ́. 

Wu yǝ nwǝ lǝ cyǝ pǝ̂ŋkʉ̂ pǔ o kwyátǝ wáp mǝ̂jyǝ Emayʉ̂sǝ á, tǝ́mtǝ́ píŋtʉ́m pɔ pyǝ wáp wǝ́ jʉ́zhʉ́' áá. 
Wu yǝ o lǝ kyǝ̌'tǝ́ thǝ̂ yáp nǝ̂ mghɔmsí á, zhí'tǝ́ wɔ́k gaǝ́ pǝ̂ gɔ pǝ́mtǝ́ yɔ́gó' tǝ́ kó ntʉ́m ghámtǝ̀ ò. 
Wu yǝ o lǝ lǝ pó' ywǝ́tsʉ́ gǝ́ pú tîŋ ó á, ghǝ̂ yɔk nǝ́ ghaptǝ lá'tǝ́ gaǝ́ ô bǝ́ bǝ́ŋ pyǝ. 
Wu yǝ ô dǝ ŋwɛ́nyǝ Páska sɛ́nyǝ́ mtʉ̂m mɔ́k á, ghǝ̌ yǝŋ ŋwɛ́nyǝ lǝ́ wɔ́k shʉɔ́tǝ́ bǝ́ŋ pɔ pyǝ wáp wǝ́ nǝ̂ ghiŋ bǝ́ jwíŋ áá. 
Wu Ntʉɔntʉɔ yǝ pǝ́ e lǝ píŋ mpfʉ́ á, há vɔk ó bí pɔ pyǝ vʉ̌ lǝ wáp.  

Ntô' bǔ la sɔ́m. Mo tǝ̂ a bǝ́ dóló gɔ́m gaǝ́ pú ló'nyǝ́ gǝ́ ê ghɔ́ pǝ́. 

 Cyǝpɔ ywɔ́k wénésǝdê ntâmgǒ ɔ bɔ́mtǝ́ wɔ́ !   

Cyǝpɔ pfʉ̂jám, ghɔ́ sɔ́' sha' wɔ́k ! 

Wu yǝ ô bǝ́ gǝgɛ mghɛnyǝ ba yǝ bǝ̌ŋnǝ́ á, _ ghɔ́ bʉ́'tǝ́ mghɛgho ŋkwí' gʉ̂' yap.

Bhǝkâm mpwǎŋkò, _ tǝ́mtǝ́ pɔ pyǝ msɔ̌knyǝ́ kǝ vʉ̌ pǝ́ ŋó' wáp. 

Múmâ ŋkwimo bǝ̌ŋ, _ zhwyǝ́tǝ́ mo yǝ ghǝghʉɔ pû vʉ̌ wǝ́ ŋkɔ́p é. 

A lě shyǝ m nǝ̂ bɛnyǝpɛnyǝ o, ŋwɛ́nyǝ o kó sîcǎ' : _ ghǝ̂ mpfaǝ́sî pɔ́k cǝ̂ŋtǝ́ ŋkó ntʉ́m yǝŋ ŋwɛ́nyǝ̀. 

Kǝ̂ ghaǝ̂ "gaǝ tí tǝ́ "! 

Nǝ́ yǝŋ tɔ́sǝdê tyǝ̌'pfô, â Cyǝpɔ ghǝ́ pǝ ywók ŋwɛ́nyǝ́ŋwɛ́nyǝ́ ! 

Amen ! Amen ! Alléluia!

Mûjʉjʉ páskà, wu yǝ ô sɔk mhɔ sîcǎ', lǝ mcyǝ mǔ myǝ a lǝ pfyǝ á dɔ́nyǝ́ wɔ́k.

Mûjʉjʉ páskà, wu yǝ ô gyǝ́' ŋwà'nyǝ̀ vɔ̀k, ghǝ̌ pɔ pyǝ wâp dzǝ ó á, yɔ̂ bǝ pú vǝ tsô tsáp ntʉ́m ó.

Mûjʉjʉ páskà, wu yǝ tsǝ́ mta'shyǝ vɔ̂k sá' fǝ́ nǝ́ ò, ghǝ̂ msɔm fʉ̂' ó lɔ́m ntʉ́m Dyǝ̂sî ò. 

Mûjʉjʉ páskà, wu yǝ ô munyǝ ntʉ́m ghámtǝ á, pǝ́ ŋka' bí pɔ pyǝ o lǝ cǐ áá.

Ô bǝ́ nǝ́zhi bǝ́ nǝ́mìŋ,
bǝ́ dǝŋdzǝ bǝ́ jʉɔ̀jʉ̀m,
bǝ́ nǝ́tô' ba nǝ́mìŋ,
á ghámtǝ mama pǝ́ bû !

Buŋbuŋ fǝládê shyǝ̂ŋkǔ' bí po lǝ́ o !

Wɔ́ nê bǝ́ gwya shîcǐ, pǝnuŋpwɔ' fò, guŋ dɔ̂lɔ̌, pɔ bǝ́ pɔ Sí; pɔ pyǝ Sǐ lǝ cwǒ' gaǝ́ wáp pǝ́ shyányǝ́ msyanyǝ mo yǝ e lǝ kě wáp nǝ́ ntǝ́m jʉ́m, níŋ wáp ntʉ́m puŋtǝ́ ŋka' é. Nǝ̂kǝ́lǝ́, po latǝ̂ gǝ bǝ́ pɔ pyǝ́ pǝ́, tǝ́ pô bǝ́ tyǝ́' ɔ bǝ́ pɔ Sí. A lǝ̂ bǝ ŋkuŋnyǝ̌ kǝm wɔ́, tǝ́ ǎ tyǝ́' ɔ, bǝ Sǐ kě da'tǝ wɔ́ ŋkuŋnyǝ e. 

Nǝ́ yǝŋ sásǝdê dzǝ̂dzǝ, pǝ ló gaǝ̂ Cyǝpɔ té wɔ́kpǝ ntʉ́m jʉ́m, pǝ zhyǝ́ nǝ́ ló'tǝ guŋ mnwǝ myǝ á sí ná' wɔ́kpǝ̀. 

Mo tǝ́ nǝ̂ wa mú' shu bǝ e dó'ló' pǝ́.

Pǝ wúŋ tsɔ'ɔ shwǝ́ m Cyǝpɔ Yésô ! 

Kámtǝ́ gaǝ́ pyǝ̂ bǝ́ pɔ tǝ jʉ̂'thǝ́, bíŋ bǝ́ pǝtǝlǒ'nyǝ́ bíŋ :
_ kwi' nǝ́pîŋ Dyǝ̂sî ò. 

Lǝ́ puŋtʉ̂m má' mnyǝ́ nǝ́ pɔ pyǝ wâp giŋ tǝpǝ̌ díŋ ó :
_ la'tǝ nǝ́ o jyǝ́ á wáp tiŋ Gɛvɔk yap. 

O lě dǝ bɛnyǝpɛnyǝ o gwó' bvǝ́nyǝ́ :
_ lǝ́ ntamtǝ bǝ̌ŋnǝ̂ ó shú'tǝ́ ntǝ̂mntǝ̌m. 

Wu yǝ ô bǝ́ Fyǝ' pɔmtʉɔ ba mpfaǝ́sí á, 
_ cɔ́m mtso pɔ pyǝ wáp lě jâp yap nǝ́pîŋ nǝ́ ò. 

Po pǝ́ ŋkámtǝ́ pɔ pyǝ wáp lǝ cǐm wɔ́ áá : wáp lǝ sîŋ ghɔm Sí bí po. Po yɔ́ pâ' yáp vɔk lǝ nǝ míŋ á fo' píŋtʉ̂m yap. Yéso Krǐstò, kǝ yǒ kǝ tyǝ̂' ɔ lǝ̂, ê bǝ́ á yʉ́, bíŋ bǝ́ gɔ́ lá' pǝ́ á yʉ́ nǝ̂ guŋ mcwǝ awɛ́. Ka po píŋ pú lǝ̂ ntîntǐ mcwyatǝ dyǝ' shú' thǝ̂ yɔ́.  

Mó a bǝ́ hɔ́jyǝ kwǝ é ghǝ̂msí

Po kə̂ pǐŋ mo ywɔ́k fʉ́ wɔ́ cʉ́sǝdê gɔ̂sʉɔ̂ ɔ :
Dzʉ̌ ka pûŋ...